DNews:25 OCT:హైదరాబాద్: బతుకు దెరువు కోసం జోర్డాన్ (Jordan) వెళ్లి అక్కడ చిక్కుకుపోయిన 12 మంది తెలంగాణ వలస కార్మికులు ఎట్టకేలకు స్వరాష్ట్రానికి చేరుకున్నారు. బీఆర్ఎస్ ఎమ్మెల్యే హరీశ్ రావు (Harish Rao) దాదాపు రెండు వారాల పాటు చేసిన అవిశ్రాంత కృషి ఫలితంగానే ఇది సాధ్యమైంది.
కార్మికుల ఆవేదన, కృతజ్ఞత: శనివారం ఉదయం శంషాబాద్ ఎయిర్పోర్టులో దిగిన బాధితులు నేరుగా హరీశ్ రావు ఇంటికి వెళ్లి ఆయనను కలిశారు. గతంలో కాంగ్రెస్, బీజేపీ ఎంపీలు, ఎమ్మెల్యేలకు తమ సమస్య చెప్పుకున్నా ఎవరూ పట్టించుకోలేదని వారు ఆవేదన వ్యక్తం చేశారు. తమను తిరిగి భారత దేశానికి తీసుకువచ్చిన హరీశ్ రావుకు, బీఆర్ఎస్ పార్టీకి జీవితాంతం రుణపడి ఉంటామని తెలిపారు. హరీశ్ రావు వారి కుటుంబ పరిస్థితులు, జోర్డాన్లో ఎదుర్కొన్న ఇబ్బందులను అడిగి తెలుసుకున్నారు. ఎలాంటి ఆందోళన చెందవద్దని భరోసా ఇచ్చి, రాష్ట్రంలోనే ఉండి ఉపాధి మార్గాలు అన్వేషించాలని సూచించారు. అనంతరం జగిత్యాల, నిర్మల్, కామారెడ్డి, నిజామాబాద్, సిద్దిపేట జిల్లాల్లోని వారి సొంతూళ్లకు ప్రత్యేక వాహనాల్లో తరలించారు.
హరీశ్ రావు ప్రకటన: ఈ సందర్భంగా హరీశ్ రావు మాట్లాడుతూ.. కేసీఆర్ ఆదేశాల మేరకు జోర్డాన్లో చిక్కుకున్న 12 మందిని స్వదేశానికి తీసుకురావడానికి కృషి చేశామన్నారు. జోర్డాన్, ఇజ్రాయిల్, గల్ఫ్ వంటి దేశాలకు వెళ్లే అనేక మంది ఏజెంట్ల చేతుల్లో చిక్కుకుని బతుకులు ఆగం చేసుకుంటున్నారని ఆందోళన వ్యక్తం చేశారు. “12 మంది కార్మికుల సమస్య తెలియగానే కేంద్ర, రాష్ట్ర ప్రభుత్వాలకు, జోర్డాన్లోని ఇండియన్ ఎంబసీకి విజ్ఞప్తి చేసినా స్పందన లేదు. అందుకే పెనాల్టీ కట్టి, విమాన టికెట్ల ఖర్చులను స్వయంగా భరించి వారిని తిరిగి తీసుకువచ్చాం.” అని ఆయన వివరించారు.
ప్రభుత్వాలపై విమర్శలు: వలస కార్మికుల విషయంలో కేంద్ర, రాష్ట్ర ప్రభుత్వాలు నిర్లక్ష్యం వహిస్తున్నాయని హరీశ్ రావు విమర్శించారు. “మన పిల్లల్ని మనం కాపాడుకోవడం ప్రభుత్వాల బాధ్యత. ప్రభుత్వాలు మొద్దునిద్ర పోతే బీఆర్ఎస్ పార్టీ ఈ 12 మందినీ కాపాడింది” అన్నారు.
ముఖ్యమంత్రి రేవంత్ రెడ్డి గల్ఫ్ సంక్షేమ బోర్డు, ప్రత్యేక పాలసీ హామీ ఇచ్చినా రెండేళ్లయినా స్పందన లేదని, హామీలు నెరవేర్చలేదని విమర్శించారు. అలాగే, కేంద్ర మంత్రులు కిషన్ రెడ్డి, బండి సంజయ్ విదేశాల్లో ఇబ్బందులు పడుతున్న తెలంగాణ బిడ్డలను తీసుకురావడానికి ప్రత్యేక విభాగాన్ని ఏర్పాటు చేయాలని డిమాండ్ చేశారు.
వ్యక్తిగత చొరవ: జోర్డాన్ కార్మికుల సమస్య తన దృష్టికి రాగానే హరీశ్ రావు.. కేంద్ర మంత్రులు, విదేశీ వ్యవహారాల శాఖ అధికారుల దృష్టికి సమస్యను తీసుకువెళ్లారు. బీఆర్ఎస్ ఎంపీ సురేశ్ రెడ్డి ద్వారా ఎంబసీ అధికారులతో మాట్లాడించారు. చివరకు, కార్మికులను తీసుకువెళ్లేందుకు కంపెనీ అంగీకరించగా, వారికి కట్టాల్సిన పెనాల్టీ మొత్తాన్ని, స్వదేశానికి రావడానికి అయ్యే విమాన టికెట్లను సైతం హరీశ్ రావు స్వయంగా భరించి మానవత్వం చాటుకున్నారు.