D NEWS: తెలంగాణలో కొత్తగా మంజూరయ్యే చేయూత పెన్షన్లను దసరా లోపే పంపిణీ చేయాలని మంత్రి సీతక్క అధికారులను ఆదేశించారు. అర్హులైన లబ్ధిదారులకు సామాజిక భద్రత పెన్షన్ త్వరగా అందేలా ప్రక్రియను వేగవంతం చేయాలని సూచించారు.
కొత్తగా వచ్చిన పెన్షన్ దరఖాస్తులను క్షేత్రస్థాయిలో పరిశీలించాలని సీతక్క ఆదేశించారు. దరఖాస్తుదారుల అర్హతలను పూర్తిగా నిర్ధారించాలని సూచించారు. సామాజిక, ఆర్థిక పరిస్థితులతో పాటు సంబంధిత పెన్షన్ కేటగిరీ నిబంధనలను పరిశీలించాలని చెప్పారు.
అలాగే, వితంతువులు, ఒంటరి మహిళలు, దివ్యాంగులు, గీత కార్మికులు, నేత కార్మికుల దరఖాస్తులను పరిశీలించనున్నారు. తలసేమియా, సికిల్సెల్, హీమోఫీలియా, పైలేరియా, డయాలసిస్ వంటి కేటగిరీలకు సంబంధించిన ధ్రువపత్రాలను కూడా అధికారులు తనిఖీ చేయనున్నారు.
అయితే, అర్హులైన వారిని స్పష్టంగా గుర్తించాలని సీతక్క సూచించారు. అనర్హులుగా తేలిన దరఖాస్తులకు కారణాలను నమోదు చేయాలని ఆదేశించారు. ధ్రువపత్రాలు, వయస్సు, వైకల్యం, వృత్తి, కుటుంబ పరిస్థితులను పరిశీలించాలని సూచించారు.
ఇక దసరా లోపే కొత్త పెన్షన్ల పంపిణీ పూర్తి చేయడంపై ప్రభుత్వం దృష్టి పెట్టింది. గతంలో రాష్ట్రంలో 2.5 లక్షల కొత్త చేయూత పెన్షన్లకు ప్రభుత్వం అనుమతి ఇచ్చింది. దరఖాస్తుల పరిశీలన, అర్హుల ఎంపిక, మంజూరు ప్రక్రియను వేగంగా పూర్తి చేసి లబ్ధిదారులకు ప్రయోజనం అందించాలని ప్రభుత్వం లక్ష్యంగా పెట్టుకుంది.