DNews:27 Jan: తెలంగాణ పబ్లిక్ సర్వీస్ కమిషన్ (TGPSC) నియామక ప్రక్రియలో విప్లవాత్మక మార్పులు రానున్నాయి. గణతంత్ర దినోత్సవం సందర్భంగా నిన్న టీజీపీఎస్సీ చైర్మన్ బుర్రా వెంకటేశం ఈ కీలక ప్రకటన చేశారు. నోటిఫికేషన్ విడుదలైన నాటి నుంచి నిర్ణీత గడువులోనే ఉద్యోగాల భర్తీని పూర్తి చేయాలని కమిషన్ లక్ష్యంగా పెట్టుకుంది.
ఒకే పరీక్షతో పూర్తయ్యే నియామకాలను నోటిఫికేషన్ ఇచ్చిన 3 నెలల్లోనే పూర్తి చేస్తారు. ప్రిలిమ్స్, మెయిన్స్ వంటి బహుళ దశలున్న పరీక్షల (ఉదా: గ్రూప్-1) ప్రక్రియను గరిష్టంగా 6 నెలల్లోగా ముగిస్తారు. 2026 సంవత్సరాన్ని కమిషన్ సంస్కరణల నామ సంవత్సరంగా చైర్మన్ అభివర్ణించారు. ఫలితాల కోసం అభ్యర్థులు ఏళ్ల తరబడి వేచి చూడాల్సిన అవసరం లేకుండా పారదర్శకమైన టైమ్లైన్లను పాటిస్తామని ఆయన హామీ ఇచ్చారు.
ఇప్పటికే పెండింగ్లో ఉన్న రిక్రూట్మెంట్లన్నింటినీ పూర్తి చేశామని, దేశంలోనే తొలిసారిగా రిసోర్స్ పర్సన్ల సమగ్ర డేటాబేస్ను కూడా రూపొందించామని ఆయన వెల్లడించారు. జూన్ 2026 నాటికి రాష్ట్రంలో 1 లక్ష ప్రభుత్వ ఉద్యోగాలను భర్తీ చేయాలన్న ప్రభుత్వ లక్ష్యంలో భాగంగా ఈ సంస్కరణలు కీలక పాత్ర పోషించనున్నాయి.