DNews:07 OCT:తెలంగాణ రాష్ట్రంలో మరోసారి ఎన్నికల వాతావరణం నెలకొంది. జూబ్లీహిల్స్ అసెంబ్లీ నియోజకవర్గానికి ఉప ఎన్నిక తేదీలను కేంద్ర ఎన్నికల సంఘం ప్రకటించింది. ఎన్నికల ప్రధాన అధికారి జ్ఞానేశ్ కుమార్ వెల్లడించిన వివరాల ప్రకారం, ఉప ఎన్నిక నవంబర్ 11న జరుగనుంది.
ఎన్నికల షెడ్యూల్ వివరాలు ఇలా ఉన్నాయి:
- అక్టోబర్ 13: నోటిఫికేషన్ విడుదల
- అక్టోబర్ 21: నామినేషన్ల స్వీకరణ చివరి తేదీ
- అక్టోబర్ 22: నామినేషన్ల పరిశీలన (స్క్రూటినీ)
- నవంబర్ 11: పోలింగ్
- నవంబర్ 14: లెక్కింపు, ఫలితాల ప్రకటింపు
పరిశీలన:
2023 అసెంబ్లీ ఎన్నికల్లో జూబ్లీహిల్స్ నుండి బీఆర్ఎస్ అభ్యర్థి మాగంటి గోపీనాథ్ విజయం సాధించారు. అయితే, ఈ ఏడాది జూన్లో గుండెపోటుతో ఆయన మరణించడంతో స్థానము ఖాళీ అయ్యింది. దీంతో ఉప ఎన్నిక తప్పనిసరి అయింది.
రాజకీయ సమీకరణాలు:
- బీఆర్ఎస్: మాగంటి గోపీనాథ్ సతీమణి సునీతా గోపీనాథ్ కు పార్టీ టికెట్ కేటాయించింది.
- కాంగ్రెస్: ఈ సీటు కోసం పలు పేర్లు పరిశీలనలో ఉన్నాయి. ముఖ్యంగా నవీన్ యాదవ్, బొంతు రామ్మోహన్, సీఎన్ రెడ్డి, అంజన్కుమార్ యాదవ్ లు పోటీలో ఉన్నారు. వీరిలో నవీన్ యాదవ్, బొంతు రామ్మోహన్, సీఎన్ రెడ్డి పేర్లను ముఖ్యమంత్రి రేవంత్ రెడ్డి పార్టీ అధిష్టానానికి సిఫారసు చేసినట్లు సమాచారం. వీరిలో ఒకరిని తుది అభ్యర్థిగా త్వరలోనే ప్రకటించే అవకాశం ఉంది.
ఈ ఉప ఎన్నికలో ప్రధానంగా బీఆర్ఎస్, కాంగ్రెస్, బీజేపీ మధ్య హోరాహోరీ పోటీ నెలకొనవచ్చని రాజకీయ విశ్లేషకులు అంచనా వేస్తున్నారు.