DSports:14 OCT:ముంబై: ఐపీఎల్ 2026 మినీ వేలం డిసెంబర్ 13 లేదా 14న జరగనుంది. ఈ నేపథ్యంలో అన్ని ఫ్రాంచైజీలు తమ ప్లేయర్ల రిటెన్షన్, రిలీజ్ జాబితాలపై దృష్టి సారించాయి. తొలి ట్రోఫీని గెలుచుకుని ఉత్సాహంలో ఉన్న రాయల్ ఛాలెంజర్స్ బెంగళూరు (ఆర్సీబీ) వచ్చే సీజన్ కోసం సమీకరణాలను సర్దుబాటు చేస్తోంది. జట్టు మరింత పటిష్టం కావడమే లక్ష్యంగా కీలక నిర్ణయాలు తీసుకునే ఆలోచనలో ఉంది.
🔴 లివింగ్స్టోన్, తుషారా, రసిఖ్ సలాం దార్ లకు గుడ్ బై
2025 మెగా ఆక్షన్లో రూ.8.75 కోట్ల భారీ ధరకు కొనుగోలు చేసిన ఇంగ్లాండ్ ఆల్రౌండర్ లియామ్ లివింగ్స్టోన్ పూర్తిగా నిరాశపరిచాడు. 10 మ్యాచ్ల్లో కేవలం 112 పరుగులు మాత్రమే చేసి, బౌలింగ్లోనూ ప్రభావం చూపలేకపోయాడు. దీంతో అతడిని రిలీజ్ చేయాలని ఆర్సీబీ నిర్ణయించిందని సమాచారం.
అదేవిధంగా రూ.6 కోట్లకు కొనుగోలు చేసిన రసిఖ్ సలాం దార్ కేవలం రెండు మ్యాచ్లు మాత్రమే ఆడాడు. జమ్మూ-కాశ్మీర్ ఆల్రౌండర్ జట్టుకు పెద్దగా ఉపయోగం లేదని భావిస్తోంది.
ఇక శ్రీలంక పేసర్ నువాన్ తుషారా, న్యూజిలాండ్ వికెట్ కీపర్ టిమ్ సీఫెర్ట్, జింబాబ్వే పేసర్ బ్లెస్సింగ్ ముజారబానీలను కూడా ఆర్సీబీ రిలీజ్ చేసే అవకాశం ఉంది.
🟢 కెమరూన్ గ్రీన్పై బెంగళూరు కన్ను
మినీ ఆక్షన్లో ఆర్సీబీ లక్ష్యం ఆస్ట్రేలియా స్టార్ ఆల్రౌండర్ కామెరూన్ గ్రీన్. గతంలో బెంగళూరు తరఫున ఆడి చక్కని ప్రదర్శన కనబరిచిన గ్రీన్, 2025 సీజన్లో గాయం కారణంగా దూరమయ్యాడు. కానీ ఇప్పుడు తిరిగి టాప్ ఫామ్లోకి వచ్చాడు.
ఇటీవలే వెస్టిండీస్పై జరిగిన ఐదు టీ20ల్లో వరుసగా 51, 56*, 11, 55*, 32 పరుగులతో దంచికొట్టాడు. ఆ తర్వాత సౌతాఫ్రికాతో జరిగిన తొలి టీ20లో 13 బంతుల్లో 4 ఫోర్లు, 3 సిక్సర్లతో 35 పరుగులు చేశాడు.
బ్యాటింగ్తో పాటు ఫాస్ట్ బౌలింగ్ చేయగలిగే ఈ ఆల్రౌండర్పై ఆర్సీబీతో పాటు మరెన్నో ఫ్రాంచైజీలు కన్నేశారు. వేలంలో గ్రీన్ అత్యధిక ధర పలికే ఆటగాళ్లలో ఒకరిగా ఉండే అవకాశం ఉంది.
🔹 ఆర్సీబీ లక్ష్యం
మొత్తం మీద, ఐపీఎల్ 2025 టైటిల్ గెలుచుకున్నప్పటికీ, ఆర్సీబీ తమ లోపాలను సరిదిద్దుకుని, ముఖ్యంగా కామెరూన్ గ్రీన్ వంటి నిఖార్సైన ఆల్-రౌండర్ను జట్టులోకి తీసుకుని, మినీ వేలంలో మరింత పటిష్టంగా మారాలని లక్ష్యంగా పెట్టుకుంది.