DNews : 14 Oct: మావోయిస్టు ఉద్యమంకి తీవ్ర ఎదురుదెబ్బ తగిలింది. సీపీఐ (మావోయిస్ట్) పొలిట్బ్యూరో సభ్యుడు, సీనియర్ నాయకుడు మల్లోజుల వేణుగోపాల్ రావు అలియాస్ సోను మహారాష్ట్రలోని గడ్చిరోలి జిల్లాలో 60 మంది మావోయిస్టు కార్యకర్తలతో కలిసి అధికారుల ముందు లొంగిపోయారు. ఈ సంఘటనతో అటవీ ప్రాంతాల్లో మావోయిస్టుల శక్తి మరింత బలహీనపడిందని పోలీసులు తెలిపారు.
తెలంగాణకు చెందిన మల్లోజుల వేణుగోపాల్ రావు గత వారం మావోయిస్టు పార్టీకి రాజీనామా చేసినట్లు వార్తలు వచ్చాయి. ఒక లేఖలో, “నిస్సారమైన త్యాగాలు చేయొద్దు, మీ ప్రాణాలను కాపాడుకోండి” అని చెబుతూ తన సహచరులను జీవన స్రవంతిలో చేరమని ఆయన పిలుపునిచ్చారు. ఆ లేఖ మావోయిస్టు నాయకత్వంలోని విభేదాలను బయటపెట్టింది.
తాజా సమాచారం ప్రకారం, “ప్రస్తుత పరిస్థితిలో సాయుధ పోరాటాన్ని కొనసాగించడం సాధ్యం కాదు” అని మల్లోజుల వేణుగోపాల్ రావు తన సహచరులకు స్పష్టంగా చెప్పారు. ఇప్పటివరకు మావోయిస్టులు తీసుకున్న మార్గం పూర్తిగా తప్పు అని కూడా ఆయన అంగీకరించారు మరియు ఉద్యమం క్షీణించడాన్ని ఆపలేకపోయినందుకు క్షమాపణలు చెప్పారు. నాయకత్వంలో వరుస తప్పుల కారణంగా మావోయిస్టులు బలహీనంగా మారారని ఆయన అన్నారు.