
టీమిండియా స్టార్ స్పిన్నర్ యుజ్వేంద్ర చాహల్ టీ20 క్రికెట్లో మరో అరుదైన ఘనత సాధించాడు. ఈ ఫార్మాట్లో 400 వికెట్లు తీసిన తొలి భారత బౌలర్గా చరిత్ర సృష్టించాడు. ప్రస్తుతం జరుగుతున్న సయ్యద్ ముస్తాక్ అలీ ట్రోఫీలో హర్యానా తరఫున ఆడుతున్న చాహల్.. నవంబర్ 18న తమిళనాడుతో జరిగిన మ్యాచ్లో ఈ మైలురాయిని అందుకున్నాడు.
ఈ మ్యాచ్లో చాహల్ అద్భుతమైన బౌలింగ్తో ఆకట్టుకున్నాడు. నాలుగు ఓవర్లలో కేవలం 16 పరుగులు మాత్రమే ఇచ్చి మూడు వికెట్లు పడగొట్టాడు. తమిళనాడు బ్యాటర్ అమిత్ సాత్విక్ను ఔట్ చేయడం ద్వారా తన 400వ టీ20 వికెట్ను పూర్తి చేసుకున్నాడు. అనంతరం మరో రెండు వికెట్లు తీసి తన మొత్తం వికెట్ల సంఖ్యను 402కు పెంచుకున్నాడు.
చాహల్ అద్భుత బౌలింగ్తో తమిళనాడు జట్టు 124 పరుగులకే పరిమితమైంది. అనంతరం హర్యానా ఏడు వికెట్ల తేడాతో ఘన విజయం సాధించింది.
టీ20ల్లో భారత బౌలర్లలో చాహల్ అగ్రస్థానం
ఈ ఘనతతో టీ20 క్రికెట్లో అత్యధిక వికెట్లు తీసిన భారత బౌలర్గా చాహల్ తన స్థానాన్ని మరింత పటిష్టం చేసుకున్నాడు. ఈ జాబితాలో భువనేశ్వర్ కుమార్ 366 వికెట్లతో రెండో స్థానంలో ఉండగా, జస్ప్రీత్ బుమ్రా 354 వికెట్లతో మూడో స్థానంలో కొనసాగుతున్నాడు.
పీయూష్ చావ్లా 329 వికెట్లు, రవిచంద్రన్ అశ్విన్ 323 వికెట్లతో తర్వాతి స్థానాల్లో ఉన్నారు. ఇప్పటివరకు భారత బౌలర్లలో చాహల్ మాత్రమే టీ20ల్లో 400 వికెట్ల మైలురాయిని అధిగమించాడు.
ప్రపంచ స్థాయి బౌలర్ల సరసన చాహల్
టీ20 క్రికెట్లో అత్యధిక వికెట్లు తీసిన ప్రపంచ బౌలర్ల జాబితాలోనూ చాహల్ ప్రత్యేక గుర్తింపు సంపాదించుకున్నాడు.
ఈ జాబితాలో అఫ్గానిస్థాన్ స్పిన్నర్ రషీద్ ఖాన్ 743 వికెట్లతో అగ్రస్థానంలో ఉన్నాడు. వెస్టిండీస్కు చెందిన సునీల్ నరైన్ 658 వికెట్లతో రెండో స్థానంలో, డ్వేన్ బ్రావో 631 వికెట్లతో మూడో స్థానంలో కొనసాగుతున్నారు.
ఇమ్రాన్ తాహిర్ 593 వికెట్లు, ఆండ్రే రసెల్ 545 వికెట్లతో తర్వాతి స్థానాల్లో ఉన్నారు. చాహల్ 402 వికెట్లతో ప్రపంచ స్థాయి టీ20 బౌలర్ల జాబితాలో తనకంటూ ప్రత్యేక స్థానాన్ని సంపాదించుకున్నాడు.
మళ్లీ టీమిండియాలోకి వస్తాడా?
చాహల్ ఇప్పటివరకు 346 టీ20 మ్యాచ్లు ఆడి 402 వికెట్లు పడగొట్టాడు. 23.68 బౌలింగ్ సగటుతో కొనసాగుతున్న అతడి అత్యుత్తమ ప్రదర్శన 6/25. ఓవర్కు సగటున 7.77 పరుగులు ఇచ్చాడు.
భారత జట్టు తరఫున 80 టీ20 అంతర్జాతీయ మ్యాచ్లు ఆడి 96 వికెట్లు సాధించాడు. అయితే 2023 ఆగస్టు తర్వాత అతడికి టీమిండియాలో ఆడే అవకాశం దక్కలేదు.
అంతర్జాతీయ క్రికెట్కు దూరంగా ఉన్నప్పటికీ దేశవాళీ టోర్నీల్లో తన బౌలింగ్ ప్రతిభను చాటుకుంటున్నాడు. సయ్యద్ ముస్తాక్ అలీ ట్రోఫీలో తాజాగా సాధించిన ఈ ఘనతతో మరోసారి అతడి జాతీయ జట్టు పునరాగమనంపై చర్చ మొదలైంది.
మరి చాహల్కు మళ్లీ టీమిండియాలో అవకాశం దక్కుతుందా? అనేది ఆసక్తికరంగా మారింది.
