తెలంగాణ ఆర్టీసీ బస్సుల్లో ప్రయాణించే ప్రయాణికులు, విధులు నిర్వహించే సిబ్బంది భద్రతకు సంస్థ కీలక నిర్ణయం తీసుకుంది. మహిళా కండక్టర్ గుండ్ల ప్రవళిక మృతి ఘటన నేపథ్యంలో బస్సుల్లో కొత్త నిబంధనను అమల్లోకి తీసుకొచ్చింది. ఇకపై ప్యాసింజర్ డోర్లు ఉన్న అన్ని బస్సుల్లో ప్రయాణ సమయంలో తలుపులు తప్పనిసరిగా మూసి ఉంచాలని ఆదేశించింది. ఈ మేరకు TGSRTC మెకానికల్ ఇంజినీరింగ్ విభాగం అధికారులకు కీలక సూచనలు జారీ చేసింది.
హైదరాబాద్, నవంబర్ 5: తెలంగాణలో ఇటీవల చోటుచేసుకున్న మహిళా కండక్టర్ గుండ్ల ప్రవళిక మృతి ఘటన రాష్ట్రవ్యాప్తంగా తీవ్ర కలకలం రేపింది. ఈ నేపథ్యంలో ఇలాంటి ప్రమాదాలు భవిష్యత్తులో పునరావృతం కాకుండా తెలంగాణ రాష్ట్ర రోడ్డు రవాణా సంస్థ (TGSRTC) ముందస్తు భద్రతా చర్యలు చేపట్టింది. ప్యాసింజర్ డోర్లు ఏర్పాటు చేసిన బస్సులు కదులుతున్న సమయంలో తప్పనిసరిగా తలుపులు మూసి ఉంచాలని స్పష్టం చేసింది.
ఈ ఆదేశాలను ఆర్టీసీ మెకానికల్ ఇంజినీరింగ్ విభాగం అన్ని డిప్యూటీ రీజినల్ మేనేజర్లకు జారీ చేసింది. తమ పరిధిలోని బస్సుల్లో ప్రయాణికుల కోసం ఏర్పాటు చేసిన డోర్లు సక్రమంగా పనిచేస్తున్నాయా లేదా అనే విషయాన్ని క్షుణ్ణంగా పరిశీలించాలని సూచించింది. అలాగే ప్రయాణ సమయంలో తలుపులు తెరిచి ఉంచకుండా అవసరమైన చర్యలు తీసుకోవాలని ఆదేశించింది.
అసలేం జరిగింది?
భద్రాద్రి కొత్తగూడెం జిల్లాలో అక్టోబర్ 25న మహిళా కండక్టర్ గుండ్ల ప్రవళికకు సంబంధించిన విషాద ఘటన చోటుచేసుకుంది. మణుగూరు ఆర్టీసీ డిపోలో కండక్టర్‌గా పనిచేస్తున్న 24 ఏళ్ల ప్రవళిక.. మణుగూరు నుంచి భద్రాచలం వెళ్తున్న పల్లె వెలుగు బస్సులో విధులు నిర్వహిస్తున్నారు.
అదే బస్సులో ప్రయాణిస్తున్న బానోత్ మౌనికతో టికెట్ విషయంలో ప్రవళికకు వాగ్వాదం జరిగినట్లు సమాచారం. తన కుమారుడి టికెట్‌తో పాటు రూ.100 నోటుకు చిల్లర తిరిగి ఇచ్చే అంశంపై ఇద్దరి మధ్య వివాదం తలెత్తినట్లు తెలుస్తోంది. ఈ క్రమంలో ప్రయాణికురాలు కదులుతున్న బస్సు నుంచి ప్రవళికను బయటకు తోసేసినట్లు ఆరోపణలు వచ్చాయి.
ఈ ఘటనలో తీవ్రంగా గాయపడిన ప్రవళికను వెంటనే ఆసుపత్రికి తరలించి చికిత్స అందించారు. అయితే పరిస్థితి విషమించడంతో మంగళవారం రాత్రి ఆమె కన్నుమూశారు. దీంతో ఆర్టీసీ సిబ్బంది భద్రతపై తీవ్ర ఆందోళనలు వ్యక్తమయ్యాయి.
బస్సుల్లో కొత్త నిబంధన.. అధికారులకు కీలక ఆదేశాలు!
ప్రవళిక మృతి ఘటనను దృష్టిలో ఉంచుకుని TGSRTC బస్సుల భద్రతపై ప్రత్యేక దృష్టి సారించింది. ప్యాసింజర్ డోర్లు ఉన్న బస్సుల్లో ప్రయాణ సమయంలో తలుపులు మూసి ఉంచడాన్ని తప్పనిసరి చేసింది. అంతేకాకుండా డోర్ల పనితీరును అధికారులు ఎప్పటికప్పుడు తనిఖీ చేయాలని సూచించింది.
డోర్లు సరిగా పనిచేయకపోతే వెంటనే అవసరమైన మరమ్మతులు చేపట్టాలని, నిబంధనల అమలులో ఎలాంటి నిర్లక్ష్యం ఉండకూడదని స్పష్టం చేసింది. క్షేత్రస్థాయి అధికారులు ఈ ఆదేశాలను కచ్చితంగా అమలు చేసేలా చర్యలు తీసుకోవాలని సూచించింది.
మహిళా కండక్టర్ ప్రవళిక మృతి ఘటన నేపథ్యంలో ఆర్టీసీ తీసుకున్న ఈ నిర్ణయం ప్రయాణికులు, సిబ్బంది భద్రతకు ప్రాధాన్యతనివ్వడంలో కీలక అడుగుగా భావిస్తున్నారు. ఇకపై బస్సు డోర్ల పనితీరు, ప్రయాణ సమయంలో వాటి నిర్వహణపై అధికారులు మరింత అప్రమత్తంగా ఉండాల్సి ఉంటుంది.