DNews: 15 Oct: ప్రపంచంలోని అరుదైన ఖనిజాల విషయంలో చైనా తీరును అమెరికా విమర్శించింది. చైనాలో లభించే ఈ అరుదైన ఖనిజాలను నియంత్రించి, తద్వారా ప్రపంచాన్ని ఆధిపత్యం చేయడానికి ప్రభుత్వం ప్రయత్నిస్తోందని ఆరోపించింది. ప్రస్తుతం ప్రపంచవ్యాప్తంగా ఆధునిక సాంకేతిక పరికరాలు, ఎలక్ట్రిక్ వాహనాలు, రక్షణ సామగ్రి తయారీలో ఈ ఖనిజాలు కీలక పాత్ర పోషిస్తున్నాయి. చైనా ఈ వనరులలో దాదాపు 70% సరఫరాను నియంత్రిస్తుండటంతో, అమెరికా దీనిని వ్యూహాత్మక ముప్పుగా చూస్తోంది. ఇక, అక్టోబర్ 9 నుంచి అరుదైన ఖనిజాల ఎగుమతులకు అనుమతులు తప్పనిసరి చేస్తూ చైనా నిర్ణయం తీసుకున్న విషయం తెలిసిందే. ఈ ధోరణిని అమెరికా సహించదని ఆ దేశ ట్రెజరీ కార్యదర్శి స్కాట్ బెసెంట్ స్పష్టం చేశారు. చైనాను ఎదుర్కోవాలంటే తమకు భారతదేశం సహాయం అవసరమని ఆయన అన్నారు. రష్యా నుంచి చమురు దిగుమతుల విషయంలో అమెరికా భారతదేశంపై భారీ పన్నులు విధించిన విషయం తెలిసిందే. అయితే, చైనా విషయంలో తమకు సహాయం చేయాలని అమెరికా భారత్ను కోరడం గమనార్హం.
ప్రపంచంలో మరెక్కడా కనిపించని అరుదైన ఖనిజాల ఎగుమతిపై చైనా ఇటీవల ఆంక్షలు విధించిందని అమెరికా ట్రెజరీ కార్యదర్శి స్కాట్ బెసెంట్ ఇటీవల ఫాక్స్ న్యూస్ ఇంటర్వ్యూలో అన్నారు. విదేశీ కంపెనీలు వాటిని దిగుమతి చేసుకోవాలనుకుంటే, వారు చైనా ప్రభుత్వం అనుమతి పొందాలని ఆయన అన్నారు. ఇది ప్రపంచ ఆర్థిక వ్యవస్థకు ప్రత్యక్ష సవాలు అని ఆయన బీజింగ్ను విమర్శించారు. చైనా ప్రపంచ పంపిణీ వ్యవస్థలను లక్ష్యంగా చేసుకుందని, ఇది చైనాకు, ప్రపంచానికి మధ్య పోటీ అని ఆయన ఆగ్రహం వ్యక్తం చేశారు. బీజింగ్ దూకుడును అమెరికా నిరోధిస్తుందని ఆయన అన్నారు. దీనికి భారతదేశం, యూరోపియన్ దేశాల మద్దతు అవసరమని ఆయన వెల్లడించారు. అమెరికా ప్రపంచ శాంతిని కోరుకుంటుండగా, చైనా ఆర్థిక యుద్ధం చేస్తోందని స్కాట్ బెసెంట్ విచారం వ్యక్తం చేశారు.