D NEWS: Warangal Municipal Elections నేపథ్యంలో వరంగల్ నగర రాజకీయాలు వేడెక్కుతున్నాయి. అధికార కాంగ్రెస్, ప్రతిపక్ష బీఆర్ఎస్ మధ్య మాటల యుద్ధం ముదురుతోంది. మరోవైపు బీజేపీ కేంద్ర ప్రాజెక్టులను ప్రచార అంశాలుగా మార్చుకుంటోంది.
Warangal Municipal Electionsలోని 66 డివిజన్లపై పట్టు సాధించేందుకు ప్రధాన పార్టీలు వ్యూహాలు సిద్ధం చేస్తున్నాయి. గత బీఆర్ఎస్ పాలన, ప్రస్తుత కాంగ్రెస్ ప్రభుత్వ పనితీరుపై నేతలు పరస్పరం విమర్శలు చేసుకుంటున్నారు. అలాగే స్థానిక సమస్యలు, అభివృద్ధి పనులపై సవాళ్లు, ప్రతిసవాళ్లు కొనసాగుతున్నాయి.
మరోవైపు ముఖ్యమంత్రి వరంగల్ పర్యటనకు ఏర్పాట్లు జరుగుతున్న నేపథ్యంలో కాంగ్రెస్ నేతలు అభివృద్ధి పనులపై దృష్టి పెడుతున్నారు. సూపర్ స్పెషాలిటీ ఆస్పత్రి, నూతన కలెక్టరేట్, అండర్గ్రౌండ్ డ్రైనేజీ వంటి పనులకు తుది మెరుగులు దిద్దుతున్నారు. నగర మౌలిక వసతులు, ఎంజీఎం ఆస్పత్రి సమస్యలు కూడా రాజకీయ చర్చలో కీలకంగా మారాయి.
అయితే గత ప్రభుత్వ హయాంలో ప్రారంభమైన ప్రాజెక్టులకు కాంగ్రెస్ ప్రభుత్వం కొత్త రంగులు అద్దుతోందని బీఆర్ఎస్ నేతలు విమర్శిస్తున్నారు. నగర అభివృద్ధిలో తమ హయాంలో చేపట్టిన పనులే కీలకంగా ఉన్నాయని వారు చెబుతున్నారు. వచ్చే ఎన్నికల్లో మేయర్ పీఠాన్ని లక్ష్యంగా చేసుకుని ఇరు పార్టీల నేతలు క్షేత్రస్థాయిలో కార్యకలాపాలను పెంచుతున్నారు.
ఇక బీజేపీ మాత్రం కాంగ్రెస్, బీఆర్ఎస్ మధ్య జరుగుతున్న రాజకీయ విమర్శలకు భిన్నంగా కేంద్ర ప్రాజెక్టులను ప్రజల్లోకి తీసుకెళ్తోంది. మామునూరు ఎయిర్పోర్టు, కాజీపేట రైల్వే వ్యాగన్ ఫ్యాక్టరీ, కాకతీయ మెగా టెక్స్టైల్ పార్క్ వంటి అంశాలను ప్రచారంలో ప్రస్తావిస్తోంది. దీంతో 66 డివిజన్లలో రాజకీయ సమీకరణాలు ఎలా మారతాయన్నది వరంగల్ నగర రాజకీయాల్లో ఆసక్తికరంగా మారింది.