D NEWS: ఖైరతాబాద్ అసెంబ్లీ నియోజకవర్గ వివాదంపై కాంగ్రెస్ నేత పి. విజయారెడ్డి కీలక వ్యాఖ్యలు చేశారు. తాను వేసిన కేసు కొత్తది కాదని, ఇప్పటికే పెండింగ్‌లో ఉన్న పాత ఎలక్షన్ పిటిషన్‌నే కొనసాగిస్తున్నట్లు ఆమె స్పష్టం చేశారు.
కోర్టు పరిధిలో ఉన్న అంశాలపై మీడియా ముందు బహిరంగంగా చర్చించడం సరికాదని విజయారెడ్డి అన్నారు. తన పిటిషన్‌పై దానం నాగేందర్ ఏం మాట్లాడుతున్నారనేది తనకు అనవసరమని పేర్కొన్నారు. న్యాయస్థానంలో ఉన్న అంశాలపై తుది నిర్ణయం కోర్టుదేనని తెలిపారు.
ఎలక్షన్ పిటిషన్ పెండింగ్‌లో ఉన్నందున ప్రస్తుతం ఉప ఎన్నిక నిర్వహించలేమని ఎన్నికల సంఘం హైకోర్టుకు తెలిపిన విషయాన్ని విజయారెడ్డి గుర్తుచేశారు. ఈ నేపథ్యంలో తన పిటిషన్ ఉద్దేశం కొత్తగా ఎన్నికను అడ్డుకోవడం కాదని ఆమె వ్యాఖ్యల ద్వారా స్పష్టం చేశారు.
2023 అసెంబ్లీ ఎన్నికల్లో ఖైరతాబాద్ నుంచి దానం నాగేందర్ విజయం సాధించగా, విజయారెడ్డి రెండో స్థానంలో నిలిచారు. దానం నాగేందర్ ఎన్నికల అఫిడవిట్‌లో ఆస్తుల వివరాలను పూర్తిగా వెల్లడించలేదని, ఓటర్లను ప్రభావితం చేసేందుకు నగదు పంపిణీ చేశారని ఆరోపిస్తూ విజయారెడ్డి 2024లో హైకోర్టులో ఎలక్షన్ పిటిషన్ దాఖలు చేశారు.
దానం నాగేందర్‌పై అనర్హత వేటు పడటంతో ఖైరతాబాద్ స్థానం ఖాళీగా మారిన నేపథ్యంలో ఉప ఎన్నిక అంశం తెరపైకి వచ్చింది. అయితే తన పాత ఎలక్షన్ పిటిషన్‌పై తుది తీర్పు వచ్చే వరకు ఉప ఎన్నిక నోటిఫికేషన్ జారీ చేయకూడదని విజయారెడ్డి కోరడంతో ఈ వ్యవహారం మరోసారి న్యాయ, రాజకీయ వర్గాల్లో చర్చనీయాంశంగా మారింది.