నటుడు వరుణ్ తేజ్ తాజాగా నటించిన ‘కొరియన్ కనకరాజు’ సినిమా సక్సెస్ సెలబ్రేషన్స్‌ హైదరాబాద్‌లోని యూవీ క్రియేషన్స్ కార్యాలయంలో ఘనంగా నిర్వహించారు. ఈ వేడుకలో పాల్గొన్న వరుణ్ తేజ్.. ఇటీవల సోషల్ మీడియాలో చర్చకు దారితీసిన ఎన్టీఆర్ ప్రాచీన డైలాగ్ ఇమిటేషన్ వివాదంపై స్పందించారు. ఈ సందర్భంగా వివాదానికి సంబంధించి తన వివరణను వెల్లడించారు.
సినిమాలోని ఆ సన్నివేశాన్ని కావాలని వివాదం సృష్టించే ఉద్దేశంతో చిత్రీకరించలేదని వరుణ్ తేజ్ స్పష్టం చేశారు. వాస్తవానికి ఆ సీన్‌ను గత ఏడాది నవంబర్‌లోనే షూట్ చేసినట్లు తెలిపారు. సినిమా ప్రమోషన్స్‌లో భాగంగా సీనియర్ నటుడు కృష్ణ గారిని కూడా తాము ఇమిటేట్ చేశామని చెప్పారు. అయితే ట్రోలింగ్‌కు, ఇమిటేషన్‌కు చాలా తేడా ఉంటుందని ఆయన పేర్కొన్నారు.
తమకు ఏ నటుడి పట్ల, ముఖ్యంగా సీనియర్ నటుల పట్ల ఎలాంటి అగౌరవ భావన లేదని వరుణ్ తేజ్ స్పష్టం చేశారు. ఎన్టీఆర్ గారి డైలాగ్‌ను కేవలం సరదా, వినోదం కోసమే ఇమిటేట్ చేశామని, ఎవరినీ ఉద్దేశపూర్వకంగా లక్ష్యంగా చేసుకోలేదని వివరించారు. ఎవరి మనోభావాలను దెబ్బతీయాలనే ఉద్దేశం తమకు లేదని చెప్పారు.
ఈ విషయాన్ని ప్రేక్షకులు కూడా అర్థం చేసుకుని, వివాదానికి ఇక్కడితో ముగింపు పలకాలని వరుణ్ తేజ్ కోరారు. సినిమా విజయంపై కూడా ఆయన సంతోషం వ్యక్తం చేశారు. “లావణ్య చాలా హ్యాపీగా ఉంది. ఈ సక్సెస్ తర్వాత నా కొడుకు నాకు లక్‌గా అనిపిస్తోంది” అంటూ తన వ్యక్తిగత ఆనందాన్ని పంచుకున్నారు.