తిరుమల: తిరుమలకు ఆదివారం భక్తుల రద్దీ ఎలా ఉందో తెలిస్తే?

D Spiritual: Dec 22: తిరుమలలో నిన్న భక్తుల రద్దీ భారీగా ఉంది. ఆదివారం కావడంతో సాధారణ రోజుల కంటే భక్తుల సంఖ్య ఎక్కువగా ఉంది. సాధారణంగా శుక్రవారం నుంచి సోమవారం వరకు తిరుమలలో భక్తుల రద్దీ కొనసాగుతుండగా, ఇటీవలి కాలంలో ఈ సంఖ్య మరింతగా పెరిగినట్లు అధికారులు చెబుతున్నారు.

తిరుమలకు వచ్చే భక్తుల సంఖ్య పెరగడంతో పాటు స్వామివారి హుండీ ఆదాయం కూడా గతంతో పోలిస్తే గణనీయంగా పెరిగింది. భక్తుల రద్దీకి అనుగుణంగా అవసరమైన అన్ని రకాల ఏర్పాట్లను తిరుమల తిరుపతి దేవస్థానం అధికారులు చేపట్టారు. శ్రీవారి సేవకుల సేవలను కూడా వినియోగించుకుంటూ భక్తులకు మెరుగైన సౌకర్యాలు అందిస్తున్నారు.

ఇదిలా ఉండగా, ఈ నెల 16వ తేదీ నుంచి జనవరి 14వ తేదీ వరకు ధనుర్మాసం కొనసాగనుంది. ధనుర్మాసంలో వెంకటేశ్వరస్వామిని దర్శించుకుంటే శుభఫలితాలు కలుగుతాయని భక్తులు విశ్వసిస్తారు. ఈ మాసంలో విష్ణుమూర్తిని ప్రత్యేకంగా ఆరాధించే సంప్రదాయం ఉండటంతో పెద్ద సంఖ్యలో భక్తులు తిరుమలకు తరలివస్తారని తిరుమల తిరుపతి దేవస్థానం అధికారులు తెలిపారు.

ధనుర్మాసం ప్రారంభం నేపథ్యంలో ఈ నెలాఖరు నుంచి తిరుమలలో వైకుంఠ ద్వార దర్శనం కూడా ప్రారంభం కానుంది. దీనికి సంబంధించి ముందస్తుగా అవసరమైన ఏర్పాట్లు చేపడుతున్నట్లు అధికారులు వెల్లడించారు.

నేడు తిరుమలలోని వైకుంఠం క్యూ కాంప్లెక్స్‌లోని పద్నాలుగు కంపార్ట్‌మెంట్లలో భక్తులు శ్రీవారి దర్శనం కోసం వేచి ఉన్నారు. సర్వదర్శనం క్యూ లైన్‌లో ఉదయం టోకెన్లు లేకుండా ప్రవేశించిన భక్తులకు దర్శనం ఎనిమిది నుంచి పది గంటలకు పైగా సమయం పడుతుందని అధికారులు తెలిపారు.

టైమ్ స్లాట్ దర్శనం భక్తులకు సుమారు నాలుగు గంటల సమయం పడుతుండగా, మూడు వందల రూపాయల ప్రత్యేక దర్శనం టికెట్ కలిగిన భక్తులకు దర్శనం మూడు గంటల సమయంలో పూర్తవుతోందని అధికారులు వివరించారు.

నిన్న తిరుమలలో మొత్తం 78,466 మంది భక్తులు శ్రీవారిని దర్శించుకున్నారు. వీరిలో 29,722 మంది భక్తులు తమ తలనీలాలను సమర్పించి మొక్కులు చెల్లించుకున్నారు. అదే రోజు శ్రీవారి హుండీ ద్వారా 3.52 కోట్ల రూపాయల ఆదాయం లభించినట్లు తిరుమల తిరుపతి దేవస్థానం అధికారులు వెల్లడించారు.