భారతీయ సినిమా తిరుగుబాటుదారుడు: వి. శాంతారాం బయోపిక్ టైటిల్ పాత్రలో సిద్ధాంత్!

DET:DEC 02:
వి. శాంతారాం బయోపిక్‌లో సిద్ధాంత్ చతుర్వేది:
బాలీవుడ్ నటుడు సిద్ధాంత్ చతుర్వేది సినీ చరిత్రలో సుప్రసిద్ధ దర్శకుడు వి. శాంతారాం బయోపిక్‌లో నటించనున్నట్లు అధికారికంగా ప్రకటించారు. ఈ బయోపిక్‌కు కేవలం వి. శాంతారాం అనే పేరు పెట్టారు.గల్లీ బాయ్ వంటి చిత్రాలతో మంచి గుర్తింపు తెచ్చుకున్న సిద్ధాంత్, తన కెరీర్‌లో ఇంతటి చారిత్రక పాత్రను పోషించడం పట్ల ఆనందం వ్యక్తం చేశారు.

సిద్ధాంత్ ఫస్ట్ లుక్ విడుదల:
ఈ ప్రతిష్టాత్మక చిత్రం నుంచి సిద్ధాంత్ చతుర్వేది ఫస్ట్ లుక్‌ను చిత్ర బృందం ఇటీవల విడుదల చేసింది. పోస్టర్‌లో సిద్ధాంత్ పీరియడ్ దుస్తులలో అంటే సాంప్రదాయ భారతీయ దుస్తులతో పాటు కోటు ధరించి, పక్కన పాతకాలపు ఫిల్మ్ కెమెరాను పట్టుకొని నిలబడి ఉన్నారు. ఆయన ముఖంలో శాంతారాం గారి దార్శనికత, ధైర్యం,ఆత్మవిశ్వాసం స్పష్టంగా కనిపిస్తున్నాయి.భారతీయ సినిమాకు ఒక కొత్త నిర్వచనాన్ని ఇచ్చిన తిరుగుబాటుదారుడు తిరిగి బిగ్‌స్క్రీన్‌పైకి వస్తున్నారని పోస్టర్ క్యాప్షన్ ద్వారా మేకర్స్ తెలిపారు.

దర్శకుడు నిర్మాత వివరాలు:
ఈ బయోగ్రాఫికల్ డ్రామా చిత్రానికి అభిజిత్ శిరీష్ దేశ్‌పాండే రచన చేసి దర్శకత్వం వహిస్తున్నారు. ఈయన ఇంతకుముందు మరాఠీ హిట్ బయోపిక్ ఆని డా. కాశీనాథ్ ఘనేకర్ కు దర్శకత్వం వహించారు.ఈ చిత్రాన్ని రాహుల్ కిరణ్ శాంతారామ్,సుభాష్ కాలే,సరితా అశ్విన్ వార్ధే సంయుక్తంగా నిర్మిస్తున్నారు. లెజెండరీ ఫిల్మ్‌మేకర్ వి. శాంతారాం మనవడు రాహుల్ కిరణ్ శాంతారామ్ ఈ చిత్ర నిర్మాణంలో భాగం కావడం విశేషం.

వి. శాంతారాం సినీ ప్రస్థానం:
వి. శాంతారాం రాజారాం వంకుద్రే 1901లో జన్మించారు.ఆయన దాదాపు ఏడు దశాబ్దాలుగా భారతీయ సినిమాకు సేవ చేశారు.మూకీ చిత్రాల యుగం నుండి టాకీలు ఆ తర్వాత కలర్ చిత్రాల వరకు ఆయన ప్రయాణం సాగింది.1985లో భారతీయ సినీ పరిశ్రమలో అత్యున్నత పురస్కారం అయిన దాదాసాహెబ్ ఫాల్కే అవార్డును ఆయన అందుకున్నారు. దో ఆంఖే బారహ్ హాథ్,నవరంగ్,ఝనక్ ఝనక్ పాయల్ బాజే వంటి అద్భుతమైన చిత్రాలకు ఆయన దర్శకత్వం వహించారు. ఈ బయోపిక్ ద్వారా ఆయన సినీ ప్రయాణంలో ఎదురైన అడ్డంకులు సామాజిక ఇతివృత్తాలు, సాంకేతిక ఆవిష్కరణలను చూపనున్నారు.