తెలంగాణ ప్రజా పాలన ప్రభుత్వం 1000 రోజులు పూర్తి చేసుకున్న సందర్భంగా రవాణా శాఖ, ఆర్టీసీ సాధించిన ప్రగతిని ప్రభుత్వం వెల్లడించింది. ఈ సందర్భంగా మంత్రి పొన్నం ప్రభాకర్ పలు కీలక వివరాలను తెలిపారు.
మహాలక్ష్మి పథకం ద్వారా ఇప్పటివరకు 347.36 కోట్ల మంది మహిళలు ఉచితంగా ప్రయాణించగా.. వారికి రూ.12,167 కోట్ల మేర ఆదా అయినట్లు ప్రభుత్వం పేర్కొంది. ప్రయాణికుల సౌకర్యాలను మెరుగుపరిచే లక్ష్యంతో ఆర్టీసీలో భారీగా కొత్త బస్సులను అందుబాటులోకి తీసుకొచ్చింది.
ఇందులో భాగంగా 2,932 కొత్త బస్సులను కొనుగోలు చేయగా.. 1,024 ఎలక్ట్రిక్ బస్సులను (ఈవీ) అందుబాటులోకి తీసుకొచ్చినట్లు ప్రభుత్వం తెలిపింది. ప్రజలకు మెరుగైన రవాణా సేవలు అందించడంతో పాటు పర్యావరణహిత ప్రయాణాన్ని ప్రోత్సహించేందుకు ఈవీ బస్సుల సంఖ్యను పెంచుతున్నట్లు పేర్కొంది.
అలాగే ఆర్టీసీలో కొత్తగా కండక్టర్ ఉద్యోగాల నియామకాలు చేపట్టడం, కార్మికుల సంక్షేమానికి చర్యలు తీసుకోవడం, సంస్థ బకాయిలను తగ్గించడం వంటి పలు కార్యక్రమాలను అమలు చేసినట్లు ప్రభుత్వం వెల్లడించింది.
బస్స్టేషన్ల ఆధునీకరణ, ప్రయాణికులకు మెరుగైన సౌకర్యాల కల్పనతో పాటు రవాణా శాఖలో పలు సంస్కరణలు చేపట్టినట్లు తెలిపింది. ప్రజలకు మరింత మెరుగైన, సురక్షితమైన రవాణా సేవలు అందించడమే లక్ష్యంగా ప్రభుత్వం ముందుకు సాగుతోందని పేర్కొంది.
తెలంగాణలో ప్రజా పాలన ప్రభుత్వం అధికారంలోకి వచ్చి 1000 రోజులు పూర్తవుతున్న సందర్భంగా రవాణా శాఖ, టీజీఎస్ఆర్టీసీ సాధించిన ప్రగతిని ప్రభుత్వం వెల్లడించింది. ప్రజా రవాణాను మరింత బలోపేతం చేయడంతో పాటు మహిళలు, ఆర్టీసీ కార్మికులు, ప్రయాణికులకు ప్రయోజనం కలిగేలా పలు కీలక నిర్ణయాలు తీసుకున్నట్లు మంత్రి పొన్నం ప్రభాకర్ తెలిపారు.
ఆర్టీసీ సేవలను మరింత మెరుగుపరిచేందుకు కొత్త బస్సుల కొనుగోలు, ఉద్యోగ నియామకాలు, కార్మికుల సంక్షేమం, బస్స్టేషన్ల ఆధునీకరణ వంటి చర్యలు చేపట్టినట్లు ప్రభుత్వం పేర్కొంది. అలాగే సంస్థను ఆర్థికంగా బలోపేతం చేస్తూ, ప్రయాణికులకు మెరుగైన సౌకర్యాలు అందించే దిశగా పలు సంస్కరణలు అమలు చేస్తున్నట్లు తెలిపింది.
టీజీఎస్ఆర్టీసీని దేశంలోనే అగ్రశ్రేణి ప్రజా రవాణా సంస్థగా తీర్చిదిద్దే లక్ష్యంతో సంస్కరణలను కొనసాగిస్తున్నట్లు ప్రభుత్వం వెల్లడించింది.
తెలంగాణలో ప్రభుత్వం ఏర్పడిన 48 గంటల్లోనే మహాలక్ష్మి పథకం కింద మహిళలకు ఆర్టీసీ బస్సుల్లో ఉచిత ప్రయాణ సౌకర్యాన్ని ప్రారంభించినట్లు అధికారులు తెలిపారు. ఇప్పటివరకు 347.36 కోట్ల మంది మహిళలు ఉచితంగా ప్రయాణించగా.. రూ.12,167 కోట్ల మేర ప్రయాణ ఖర్చును ఆదా చేసుకున్నట్లు వెల్లడించారు. ఈ పథకం మహిళలకు ఆర్థికంగా ఎంతో ప్రయోజనం కలిగిస్తున్నట్లు వివిధ సర్వేలు సూచిస్తున్నాయని అధికారులు పేర్కొన్నారు. అలాగే దేశంలోనే తొలిసారిగా 600 ఆర్టీసీ బస్సులకు మహిళలను యజమానులుగా చేసే కార్యక్రమాన్ని చేపట్టినట్లు తెలిపారు.
మహాలక్ష్మి పథకం అమల్లోకి వచ్చిన తర్వాత ఆర్టీసీ బస్సుల ఆక్యుపెన్సీ 67 శాతం నుంచి 89 శాతానికి పెరిగిందని మంత్రి పొన్నం ప్రభాకర్ వెల్లడించారు. ప్రయాణికుల అవసరాలకు అనుగుణంగా సంస్థలో 2,932 కొత్త బస్సులను కొనుగోలు చేయగా.. ప్రస్తుతం 1,024 ఎలక్ట్రిక్ బస్సులు సేవలు అందిస్తున్నాయని తెలిపారు. హైదరాబాద్లో మరో 2,200 కొత్త ఎలక్ట్రిక్ బస్సులను అందుబాటులోకి తీసుకురానున్నట్లు పేర్కొన్నారు. పీఎం ఈ-డ్రైవ్ పథకం కింద కూడా నగరంలో ఈవీ బస్సులను నడుపుతున్నట్లు ప్రభుత్వం తెలిపింది.
ఆర్టీసీ ఉద్యోగుల సంక్షేమానికి ప్రభుత్వం ప్రత్యేక ప్రాధాన్యం ఇస్తోందని మంత్రి తెలిపారు. ఇప్పటికే రెండు పీఆర్సీలు, ఐదు డీఏలు అమలు చేశామని.. ప్రస్తుతం ఎలాంటి పెండింగ్ డీఏలు లేవని పేర్కొన్నారు. కారుణ్య నియామకాల కింద 1,424 మందికి ఉద్యోగాలు కల్పించగా, గతంలో సర్వీసు నుంచి తొలగించిన 244 మంది ఉద్యోగులను ప్రత్యేక ఐఏఎస్ కమిటీ సిఫార్సులతో తిరిగి విధుల్లోకి తీసుకున్నట్లు వెల్లడించారు.
ఆర్టీసీలో ఖాళీ పోస్టుల భర్తీకి చర్యలు చేపట్టిన ప్రభుత్వం 4,538 ఉద్యోగాల భర్తీకి నోటిఫికేషన్ జారీ చేసింది. ఇందులో 1,000 డ్రైవర్, 743 శ్రామిక పోస్టుల నియామక ప్రక్రియ పూర్తయిందని మంత్రి తెలిపారు. అలాగే మరో 1,500 కండక్టర్ పోస్టుల భర్తీకి ప్రభుత్వం అనుమతి ఇచ్చినట్లు వెల్లడించారు.