గుజరాత్‌లోని సూరత్‌లో తీవ్ర విషాద ఘటన చోటుచేసుకుంది. ఇద్దరు మైనర్ బాలురను కత్తితో పొడిచి హత్య చేశారు. నాన్పురా ప్రాంతంలోని మటన్ మార్కెట్ సమీపంలో ఆదివారం అర్ధరాత్రి ఈ ఘటన జరిగినట్లు వార్తా కథనాలు వెల్లడించాయి. ఈ ఘటనలో మహమ్మద్ ఫైజాన్ (16), అజ్మల్ షేక్ (17) ప్రాణాలు కోల్పోయారు.
ముగ్గురు మైనర్లను అదుపులోకి తీసుకున్న పోలీసులు
పోలీసుల వివరాల ప్రకారం, ‘సల్మాన్ ఖాన్’ పేరుతో ఉన్న ఇన్‌స్టాగ్రామ్ గ్రూప్‌లో వీడియోలు పోస్టు చేయడంపై మొదట గొడవ ప్రారంభమైంది. గుర్రపు స్వారీ వీడియోలను పదేపదే పోస్టు చేయడంపై అభ్యంతరం వ్యక్తం చేయడంతో సభ్యుల మధ్య వాగ్వాదం, ఆపై దూషణలు చోటుచేసుకున్నాయి.
వివాదాన్ని పరిష్కరించుకునేందుకు ఇరు వర్గాలు ఫాతిమా సమాధుల ప్రాంగణం సమీపంలో కలుసుకున్నాయి. అక్కడ మరోసారి గొడవ జరగడంతో ఫైజాన్, అజ్మల్ మధ్యలోకి వెళ్లి పరిస్థితిని చక్కదిద్దేందుకు ప్రయత్నించారు. ఈ సమయంలో ప్రధాన నిందితుడు కత్తితో ఇద్దరిపై దాడి చేసినట్లు పోలీసులు తెలిపారు.
ఈ ఘటనపై కేసు నమోదు చేసిన పోలీసులు ముగ్గురు మైనర్ బాలురను అదుపులోకి తీసుకున్నారు. సీసీటీవీ ఫుటేజీ, గ్రూప్ చాట్‌లను పరిశీలించి దర్యాప్తు చేస్తున్నారు.
ఫ్రీ ఫైర్ గేమ్ కారణమని కుటుంబ సభ్యుల ఆరోపణ
మరోవైపు, మృతుల కుటుంబ సభ్యులు ఈ గొడవకు ఆన్‌లైన్ గేమ్ ‘ఫ్రీ ఫైర్’ కారణమని ఆరోపిస్తున్నారు. గేమ్ ఆడుతున్న సమయంలో మొదలైన వివాదమే హత్యలకు దారితీసిందని వారు చెబుతున్నారు.
అయితే పోలీసుల ప్రాథమిక విచారణలో ఫ్రీ ఫైర్ గేమ్‌తో ఈ ఘటనకు సంబంధం ఉన్నట్లు ఆధారాలు లభించలేదని అధికారులు వెల్లడించారు. ఇన్‌స్టాగ్రామ్ గ్రూప్‌లో వీడియోల పోస్టింగ్, ఆ తర్వాత జరిగిన దూషణలే వివాదానికి కారణమని పోలీసుల ప్రస్తుత వివరణ.
రెండు కుటుంబాల్లో విషాదం
ఇద్దరు బాలుర మృతితో వారి కుటుంబాల్లో తీవ్ర విషాదం నెలకొంది. నిందితులపై కఠిన చర్యలు తీసుకోవాలని కుటుంబ సభ్యులు కోరుతున్నారు. ఘటనకు దారితీసిన పూర్తి కారణాలు, నిందితుల పాత్రపై పోలీసుల దర్యాప్తు కొనసాగుతోంది.