DSports 17 Nov: కోల్‌కతాలోని ఈడెన్ గార్డెన్స్‌లో టీమిండియా, సౌతాఫ్రికాల మధ్య జరిగిన తొలి టెస్ట్ మ్యాచ్‌లో భారత స్టార్ పేసర్ జస్‌ప్రీత్ బుమ్రా, సౌతాఫ్రికా కెప్టెన్ టెంబా బావుమా పట్ల చేసిన వ్యాఖ్యలు తీవ్ర వివాదానికి దారితీశాయి. మ్యాచ్ తొలి రోజు, సౌతాఫ్రికా తొలి ఇన్నింగ్స్‌లో బావుమా క్రీజులో ఉండగా, బుమ్రా వేసిన బంతి అతడి ప్యాడ్‌కు తగిలింది. ఆన్‌ఫీల్డ్ అంపైర్ నాటౌట్ ఇవ్వడంతో, బుమ్రా రిషభ్ పంత్‌తో కలిసి డీఆర్‌ఎస్ (DRS) తీసుకోవాలా వద్దా అని చర్చించారు. ఈ సమయంలో, బుమ్రా మైక్రోఫోన్‌లో రికార్డ్ అయిన మాటల్లో, “బౌనా భీ హై” అని బావుమాను ఉద్దేశించి వ్యాఖ్యానించాడు. ‘బౌనా’ అనే హిందీ పదానికి ‘మరుగుజ్జు’ అని అర్థం. బావుమా ఎత్తు తక్కువగా ఉండటం వల్ల బంతి స్టంప్స్‌ను మిస్ అయ్యే అవకాశం ఉందని చెప్పడానికి బుమ్రా ఆ పదం ఉపయోగించినా, ఇది బావుమాను ఎగతాళి చేసే విధంగా ఉందని సోషల్ మీడియాలో తీవ్ర విమర్శలు వెల్లువెత్తాయి.
ఈ వివాదంపై క్రికెట్ అభిమానుల నుంచి విమర్శలు వచ్చిన నేపథ్యంలో, టెస్ట్ మ్యాచ్ ముగిసిన తర్వాత బుమ్రా ఒక పరిణతి చెందిన క్రీడాకారుడిలా వ్యవహరించాడు. మ్యాచ్‌లో సౌతాఫ్రికా 30 పరుగుల తేడాతో విజయం సాధించిన వెంటనే, బుమ్రా నేరుగా టెంబా బావుమా వద్దకు వెళ్లి అప్యాయంగా అతని భుజంపై చేయి వేసి మాట్లాడాడు. తాను ఉద్దేశపూర్వకంగా ఆ పదం వాడలేదని, అది సరదాగా చేసిన వ్యాఖ్య మాత్రమేనని, అయినప్పటికీ బావుమా మనసు నొచ్చుకుని ఉంటే క్షమించాలని (సారీ) కోరినట్లు సమాచారం.
దీనికి ప్రొటీస్ కెప్టెన్ బావుమా కూడా సానుకూలంగా స్పందించి, బుమ్రాను ఆలింగనం చేసుకుంటూ నవ్వుతూ కనిపించాడు. వీరిద్దరూ నవ్వుతూ మాట్లాడుకున్న వీడియో సోషల్ మీడియాలో వైరల్ అయింది. బుమ్రా స్వయంగా వెళ్లి క్షమాపణలు చెప్పడంతో ఈ వివాదానికి తెరపడింది. ఈ చర్యను నెటిజన్లు, క్రికెట్ విశ్లేషకులు ఎంతగానో ప్రశంసించారు. తొలి టెస్టులో ఓడినప్పటికీ, బుమ్రా చూపించిన ఈ క్రీడా స్ఫూర్తి అందరి దృష్టిని ఆకర్షించింది.