D Spiritual: Oct 31: అయ్యప్ప భక్తులకు శుభవార్త.. రూ.2 లక్షల జీవిత బీమా పథకం
శబరిమల: శబరిమల అయ్యప్ప స్వామి దర్శనానికి వచ్చే భక్తులకు కేరళలోని ట్రావెన్‌కోర్ దేవస్థానం బోర్డు (TDB) శుభవార్త అందించింది. యాత్రకు వచ్చే భక్తుల కుటుంబాలకు ఆర్థిక భరోసా కల్పించే లక్ష్యంతో రూ.2 లక్షల జీవిత బీమా పథకాన్ని ప్రవేశపెట్టాలని నిర్ణయించింది. లైఫ్ ఇన్సూరెన్స్ కార్పొరేషన్ ఆఫ్ ఇండియా (LIC) సహకారంతో ఈ పథకాన్ని అమలు చేయనుంది.
ఈ పథకం ప్రకారం శబరిమల యాత్రకు వచ్చిన భక్తులు అనుకోని కారణాలతో మరణిస్తే, వారి కుటుంబ సభ్యులకు రూ.2 లక్షల బీమా పరిహారం అందించనున్నారు. ఇప్పటివరకు యాత్రికులకు కేవలం ప్రమాద బీమా సదుపాయం మాత్రమే అందుబాటులో ఉండగా, ప్రత్యేకంగా జీవిత బీమా పథకాన్ని ప్రవేశపెట్టడం ఇదే తొలిసారి. ఈ బీమాకు సంబంధించిన ప్రీమియం మొత్తాన్ని కూడా దేవస్థానం బోర్డే చెల్లించనుంది. దీంతో భక్తులపై ఎలాంటి అదనపు ఆర్థిక భారం పడకుండా బీమా రక్షణ కల్పించనున్నారు.
వర్చువల్ క్యూ బుకింగ్ సమయంలో వివరాల సేకరణ
ఈ పథకం అమలులో భాగంగా శబరిమల దర్శనం కోసం వర్చువల్ క్యూ బుకింగ్ చేసుకునే సమయంలోనే భక్తుల వ్యక్తిగత వివరాలతో పాటు నామినీ వివరాలను కూడా సేకరించనున్నారు. యాత్రికులు నమోదు చేసిన నామినీకి బీమా పరిహారం అందేలా అవసరమైన ఏర్పాట్లు చేయనున్నారు.
భక్తుల కుటుంబాలకు ఆర్థిక భరోసా
శబరిమల యాత్రలో భక్తుల రద్దీ, ప్రయాణ సమయంలో ఎదురయ్యే ఇబ్బందులు, అనుకోని ప్రమాదాలను దృష్టిలో ఉంచుకుని దేవస్థానం బోర్డు ఈ నిర్ణయం తీసుకున్నట్లు తెలుస్తోంది. భక్తుల భద్రతతో పాటు వారి కుటుంబాల ఆర్థిక భవిష్యత్తుకు భరోసా కల్పించడంలో ఈ పథకం కీలకంగా మారనుంది. దేశంలోని వివిధ ప్రాంతాల నుంచి లక్షలాది మంది భక్తులు తరలివచ్చే అయ్యప్ప యాత్రలో ఈ జీవిత బీమా సదుపాయం యాత్రికులకు అదనపు భరోసాను అందించనుంది.