D News: Aug 22: విద్యుత్ సంస్థల్లో 629 ఏఈఈ పోస్టులకు ఆగస్టు 23 నుంచి పరీక్షలు
విద్యుత్ సంస్థల్లో 629 అసిస్టెంట్ ఎగ్జిక్యూటివ్ ఇంజినీర్ (AEE) పోస్టుల భర్తీకి కంప్యూటర్ ఆధారిత పరీక్ష (CBT) నిర్వహించేందుకు అన్ని ఏర్పాట్లు పూర్తయ్యాయి. ఈ పరీక్షలు ఆగస్టు 23 నుంచి 27 వరకు నిర్వహించనున్నట్లు ట్రాన్స్కో జేఎండీ సాయిసూర్యప్రవీణ్చంద్ తెలిపారు. ఈ పోస్టులకు మొత్తం 1.05 లక్షల మంది అభ్యర్థులు దరఖాస్తు చేసుకున్నట్లు వెల్లడించారు.
పరీక్షల్లో ఎలాంటి మాల్ప్రాక్టీస్కు అవకాశం లేకుండా కట్టుదిట్టమైన భద్రతా ఏర్పాట్లు చేశారు. బయోమెట్రిక్ ధ్రువీకరణ, సీసీ కెమెరాల పర్యవేక్షణ, కేంద్ర స్థాయి మానిటరింగ్ వంటి చర్యలు చేపట్టారు. మెరిట్, రిజర్వేషన్ నిబంధనలు, అభ్యర్థుల ప్రాధాన్యతల ఆధారంగా తుది ఎంపిక ప్రక్రియ కొనసాగుతుందని అధికారులు తెలిపారు.
ఏఈఈ పరీక్షను రోజుకు రెండు సెషన్లలో నిర్వహించనున్నారు. ఉదయం 9 గంటల నుంచి మధ్యాహ్నం 12 గంటల వరకు, అలాగే మధ్యాహ్నం 2:30 గంటల నుంచి సాయంత్రం 5:30 గంటల వరకు పరీక్ష జరుగుతుంది. ఆంధ్రప్రదేశ్లో 81 పరీక్షా కేంద్రాలు, రాష్ట్రం వెలుపల 13 కేంద్రాలను ఏర్పాటు చేశారు.
పరీక్ష కేంద్రాల నుంచి ప్రశ్నపత్రాలు, సమాధానాలకు సంబంధించిన సమాచారం బయటకు వెళ్లకుండా ప్రత్యేక భద్రతా చర్యలు తీసుకున్నారు. భారత్ ఎలక్ట్రానిక్స్ లిమిటెడ్ (BEL) సమన్వయంతో పరీక్షా కేంద్రాల్లో మొబైల్ జామర్లు ఏర్పాటు చేశారు. విద్యుత్ సౌధలోని కేంద్ర కమాండ్ కంట్రోల్ సెంటర్ నుంచి అన్ని పరీక్షా కేంద్రాలను ప్రత్యేకంగా పర్యవేక్షించనున్నారు.
ప్రశ్నపత్రాలను ఎన్క్రిప్టెడ్ రూపంలో సర్వర్లకు పంపించి, పరీక్ష ప్రారంభమయ్యే నిర్దేశిత సమయంలో మాత్రమే వాటిని డీక్రిప్ట్ చేసే విధానాన్ని అమలు చేస్తున్నారు. దీంతో ప్రశ్నపత్రాల భద్రతకు మరింత ప్రాధాన్యం ఇచ్చినట్లు అధికారులు తెలిపారు.
పరీక్షకు హాజరయ్యే అభ్యర్థులు హాల్టికెట్తో పాటు ఆధార్ కార్డు, ఓటర్ ఐడీ, పాస్పోర్టు, డ్రైవింగ్ లైసెన్స్ లేదా పాన్ కార్డులో ఏదైనా ఒక గుర్తింపు కార్డును తప్పనిసరిగా వెంట తీసుకురావాలి.
చివరి పరీక్ష పూర్తైన తర్వాత మూడు రోజుల్లో ప్రిలిమినరీ ఆన్సర్ కీ విడుదల చేయనున్నట్లు అధికారులు తెలిపారు. అనంతరం ఏడు రోజుల పాటు ఆన్లైన్లో అభ్యంతరాలను స్వీకరిస్తారు. 2026 సెప్టెంబర్ చివరి వారంలో ఫైనల్ ఆన్సర్ కీ, నార్మలైజ్డ్ స్కోర్లు, మెరిట్ జాబితాను విడుదల చేయాలనే ప్రతిపాదన ఉన్నట్లు వెల్లడించారు.