D News : హీరోయిన్ రకుల్ ప్రీత్ సింగ్ తనపై వస్తున్న వార్తలపై తీవ్రంగా స్పందించింది. తన మామ వాసు భగ్నానీ, భర్త జాకీ భగ్నానీకి చెందిన నిర్మాణ సంస్థ కార్యాలయాలపై ఐటీ శాఖ సోదాలు జరిగిన నేపథ్యంలో.. తన పేరును కూడా ఈ వ్యవహారంతో ముడిపెడుతూ వస్తున్న వార్తలపై ఆమె క్లారిటీ ఇచ్చింది. తనపై జరుగుతున్న ప్రచారంలో ఎలాంటి నిజం లేదని సోషల్ మీడియా వేదికగా స్పష్టం చేసింది.
‘నాపై వస్తున్న వార్తలు అవాస్తవం’
తాను ఆర్మీ కుటుంబం నుంచి వచ్చానని రకుల్ ప్రీత్ సింగ్ తెలిపింది. సినీ పరిశ్రమలో తనకు ఎలాంటి గాడ్‌ఫాదర్ లేరని, కష్టపడి ఈ స్థాయికి వచ్చానని పేర్కొంది. చిన్న వయసు నుంచే బాధ్యతాయుతమైన పౌరురాలిగా పన్నులు చెల్లిస్తున్నానని వెల్లడించింది.
ఏ నిర్మాణ సంస్థ తరఫునైనా చట్టవిరుద్ధమైన విదేశీ నగదు లావాదేవీల్లో తాను పాల్గొనలేదని రకుల్ స్పష్టం చేసింది. భారత్‌లో కానీ, విదేశాల్లో కానీ తన పేరుతో ఎలాంటి బినామీ ఆస్తులు లేవని తేల్చి చెప్పింది.
ఖరీదైన బహుమతులపై కూడా క్లారిటీ
ఎవరూ తనకు ఎలాంటి ఆస్తిని బహుమతిగా ఇవ్వలేదని రకుల్ పేర్కొంది. ఖరీదైన గిఫ్టులు స్వీకరించడం తన వ్యక్తిగత నియమాలకు విరుద్ధమని తెలిపింది. తన గురించి ఆధారాలు లేకుండా వార్తలు ప్రచురించే మీడియా సంస్థలు వాటిని తొలగించి వాస్తవాలను వెల్లడించాలని కోరింది.
మీడియా సంస్థలపై వివిధ రకాల ఒత్తిళ్లు ఉండొచ్చని తాను అర్థం చేసుకోగలనని చెప్పిన రకుల్.. అయితే వాటి కోసం నిజాలను పక్కన పెట్టడం సరికాదని అభిప్రాయపడింది.
‘నా ప్రతిష్ఠను దెబ్బతీయొద్దు’
ఒక వ్యక్తి ప్రతిష్ఠ, జీవనోపాధిపై ప్రభావం చూపేలా తప్పుడు కథనాలు ప్రచారం చేయడం సరికాదని రకుల్ ఆవేదన వ్యక్తం చేసింది. తనపై వస్తున్న ఆరోపణలకు ఎలాంటి ఆధారం లేదని స్పష్టం చేస్తూ.. తన పేరును ఇలాంటి వ్యవహారాల్లోకి లాగవద్దని కోరింది.
తాజా పరిణామాల నేపథ్యంలో రకుల్ చేసిన ఈ సుదీర్ఘ పోస్ట్ సోషల్ మీడియాలో వైరల్‌గా మారింది. తనపై వస్తున్న ప్రచారానికి ఆమె నేరుగా స్పందించడంతో ఈ అంశంపై మరింత చర్చ మొదలైంది.