D News: Aug 1: ఆంధ్రప్రదేశ్ మౌలిక సదుపాయాల అభివృద్ధిలో కీలక ఘట్టంగా విజయనగరం జిల్లా భోగాపురంలో నిర్మించిన అల్లూరి సీతారామరాజు అంతర్జాతీయ విమానాశ్రయాన్ని భారత ప్రధాని నరేంద్ర మోదీ ఘనంగా ప్రారంభించి జాతికి అంకితం చేశారు. ఉత్తరాంధ్ర అభివృద్ధికి కీలకంగా భావిస్తున్న ఈ ప్రతిష్ఠాత్మక ప్రాజెక్టు ప్రారంభోత్సవ కార్యక్రమంలో పలువురు ప్రముఖులు పాల్గొన్నారు.
విమానాశ్రయం టెర్మినల్ భవనాన్ని ప్రారంభించిన అనంతరం ప్రధాని మోదీ అక్కడ ఏర్పాటు చేసిన ఆధునిక సౌకర్యాలను పరిశీలించారు. చెక్-ఇన్ హాల్, టెర్మినల్ భవనం రూపకల్పన, డిజిటల్ కనెక్టివిటీతో పాటు విమానాశ్రయంలో అమలు చేసిన ఆధునిక సాంకేతిక వ్యవస్థల గురించి డెవలపర్ సంస్థ జీఎంఆర్ (GMR) ప్రతినిధులు ఆయనకు వివరించారు. ప్రయాణికులకు మెరుగైన సేవలు అందించే విధంగా రూపొందించిన సదుపాయాలను ప్రధాని ఆసక్తిగా పరిశీలించారు.
ఈ సందర్భంగా భవిష్యత్ అభివృద్ధి ప్రణాళికలకు సంబంధించిన నమూనాలను కూడా ప్రధాని మోదీ తిలకించారు. ఎయిర్పోర్ట్ మాస్టర్ ప్లాన్, ప్రాంతీయ ఏవియేషన్ హబ్, అలాగే విమానయాన రంగంలో నైపుణ్యాలను పెంపొందించే లక్ష్యంతో ఏర్పాటు చేయనున్న ఏవియేషన్ ఎడ్యుసిటీ ప్రాజెక్టుల వివరాలను అధికారులు ఆయనకు వివరించారు. ఈ ప్రణాళికలు ఉత్తరాంధ్రను దేశంలో కీలక ఏవియేషన్ కేంద్రంగా తీర్చిదిద్దే దిశగా రూపొందించినట్లు తెలిపారు.
అల్లూరి సీతారామరాజు పేరుతో నిర్మించిన ఈ అంతర్జాతీయ విమానాశ్రయం ద్వారా విజయనగరం, విశాఖపట్నం, శ్రీకాకుళం జిల్లాలకు ప్రపంచ స్థాయి కనెక్టివిటీ అందుబాటులోకి రానుంది. అంతర్జాతీయ విమాన సౌకర్యాలు పెరగడంతో ప్రయాణికుల రాకపోకలు సులభతరం కావడంతో పాటు పెట్టుబడులను ఆకర్షించడం, కార్గో, లాజిస్టిక్స్ రంగాలను విస్తరించడం, పర్యాటక రంగానికి ఊతమివ్వడం వంటి ప్రయోజనాలు కలగనున్నాయి.
అదే సమయంలో ఈ విమానాశ్రయం ఉత్తరాంధ్ర ఆర్థికాభివృద్ధికి కొత్త అవకాశాలను తెరుస్తుందని ప్రభుత్వం భావిస్తోంది. పారిశ్రామిక, వాణిజ్య కార్యకలాపాలు వేగవంతం కావడంతో పాటు స్థానిక యువతకు ప్రత్యక్ష, పరోక్షంగా భారీ స్థాయిలో ఉపాధి అవకాశాలు లభించే అవకాశం ఉందని అధికారులు పేర్కొంటున్నారు. దీంతో భోగాపురం అంతర్జాతీయ విమానాశ్రయం ఉత్తరాంధ్ర అభివృద్ధికి కీలక వేదికగా నిలవనుందని విశ్వసిస్తున్నారు.