DET:NOV 18:
పిల్లల కోసం తగినన్ని సినిమాలు రావట్లేదు: కుమ్కి 2 టీమ్:
కుమ్కి 2 చిత్ర దర్శకుడు ప్రభు సాల్మన్,మరియు చిత్ర బృందం ఇటీవల ఒక ఇంటర్వ్యూలో మన చలనచిత్ర పరిశ్రమపై కొన్ని ముఖ్యమైన విషయాలను పంచుకున్నారు.ముఖ్యంగా,పిల్లలకు ప్రత్యేకంగా సినిమాలు తీయడం చాలా తగ్గిపోయిందని వారు అభిప్రాయపడ్డారు.పెద్దల కోసం,యాక్షన్,హింస నిండిన సినిమాలు ఎక్కువగా వస్తున్నాయని,కానీ చిన్నపిల్లల కోసం సామాజిక విలువలు,ప్రకృతి పట్ల ప్రేమ,మంచి బంధాలను నేర్పించే చిత్రాలు మాత్రం చాలా తక్కువగా వస్తున్నాయని వారు ఆందోళన వ్యక్తం చేశారు.
హింసతో కూడిన కంటెంట్‌తో పెరుగుతున్న పిల్లలు:
ఈ రోజుల్లో పిల్లలు చూస్తున్న కంటెంట్ వారి ప్రవర్తనపై తీవ్ర ప్రభావం చూపుతోందని దర్శకుడు ప్రభు సాల్మన్ తెలిపారు. హింస,రక్తపాతం ఎక్కువగా ఉన్న సినిమాలను పిల్లలు చూడటం వల్ల అది వారి పాఠశాలల్లో ప్రవర్తనలోనూ ప్రతిబింబిస్తోందని ఆయన అన్నారు.భావోద్వేగాలు,సహజ సంబంధాలు,ప్రకృతితో అనుబంధం వంటి విషయాల గురించి పిల్లలకు తెలియజేయడం చాలా ముఖ్యమని,అలాంటి చిత్రాలను తీయాల్సిన అవసరం ఉందని ఆయన బలంగా నొక్కి చెప్పారు.
స్టీవెన్ స్పీల్‌బర్గ్‌ లాంటి వాళ్ళనే చూడండి:
ప్రభు సాల్మన్,ప్రపంచ ప్రఖ్యాత దర్శకుడు స్టీవెన్ స్పీల్‌బర్గ్‌ను ఉదాహరణగా చెప్పారు.షిండ్లర్స్ లిస్ట్ లాంటి తీవ్రమైన, పెద్దల సినిమా తీసిన స్పీల్‌బర్గ్‌,ఈ.టి. ది ఎక్స్‌ట్రా-టెరెస్ట్రియల్ లాంటి గొప్ప పిల్లల సినిమాను కూడా తీశారని గుర్తు చేశారు. అంటే,ఒక దర్శకుడు అన్ని రకాల ప్రేక్షకులకు సినిమాలు అందించగలగాలని ఆయన ఉద్దేశం.అందుకే,కుమ్కి 2 సినిమాను తాను ముఖ్యంగా పిల్లలను,ఫ్యామిలీ ప్రేక్షకులను దృష్టిలో ఉంచుకుని రూపొందించానని దర్శకుడు తెలిపారు.
కుమ్కి 2 ఒక బాలల చిత్రం :
కుమ్కి 2 సినిమా ఒక బాలల చిత్రం అని,ఈ సినిమా ఒక చిన్న పిల్లవాడికి,ఒక ఏనుగు పిల్లకి మధ్య ఉన్న అద్భుతమైన స్నేహాన్ని,అనుబంధాన్ని చూపిస్తుందని ప్రభు సాల్మన్ చెప్పారు.ఈ చిత్రంలో రొమాన్స్ లేదా ఇతర కమర్షియల్ అంశాలు ఏవీ లేవని,కేవలం మానవ సంబంధాలు,జంతువులతో మన అనుబంధం గురించి మాత్రమే ఉంటుందని ఆయన స్పష్టం చేశారు.ఈ రకమైన సినిమాలు ప్రతి సంవత్సరం కొన్ని అయినా విడుదల కావాలని ఆయన ఆశాభావం వ్యక్తం చేశారు.ఈ విషయంలో పరిశ్రమలో మార్పు రావాలని ఆయన కోరుకుంటున్నారు.