D NEWS: తెలంగాణ జన సమితి (TJS) నూతన కార్యవర్గ కమిటీని ప్రకటించింది. పార్టీ అధ్యక్షుడిగా ఎమ్మెల్సీ ప్రొఫెసర్ కోదండరాం మరోసారి ఏకగ్రీవంగా ఎన్నికయ్యారు. పార్టీ సంస్థాగత బలోపేతం కోసం నూతన కమిటీని ఏర్పాటు చేసినట్లు పార్టీ వర్గాలు తెలిపాయి.
పార్టీ అధ్యక్ష బాధ్యతలను మరోసారి చేపట్టనున్న కోదండరాం, ఎన్నికల సంఘం వ్యవహారశైలిపై పోరాటాన్ని కొనసాగించాలని పార్టీ శ్రేణులకు పిలుపునిచ్చారు. ఓటర్ల జాబితా సవరణపై ప్రజలు, ప్రజాసంఘాలు, పార్టీ కార్యకర్తలు చురుకుగా భాగస్వాములు కావాలని కోరారు.
ఢిల్లీలో రాహుల్ గాంధీ అరెస్టును కోదండరాం ఖండించారు. ఈ పరిణామం ప్రజాస్వామ్యంపై ప్రభావం చూపుతుందని ఆయన వ్యాఖ్యానించారు. ఎన్నికల సంఘం అనుసరిస్తున్న విధానాలపై ప్రజాస్వామ్య పద్ధతుల్లో నిరసనలు కొనసాగించాలని సూచించారు.
ఇందులో భాగంగా తెలంగాణ జన సమితి ఆధ్వర్యంలో హైదరాబాద్‌లోని ట్యాంక్ బండ్ వద్ద ఉన్న అంబేడ్కర్ విగ్రహం నుంచి లోక్‌భవన్ వరకు నిరసన ర్యాలీ నిర్వహించనున్నట్లు తెలిపారు. ర్యాలీకి పార్టీ శ్రేణులు పెద్ద సంఖ్యలో తరలిరావాలని కోదండరాం పిలుపునిచ్చారు.
ఎన్నికల సంఘంపై అభ్యంతరాలు, ఓటర్ల జాబితా సవరణ అంశాలను ప్రజల్లోకి తీసుకెళ్లేందుకు పార్టీ కార్యక్రమాలను విస్తరించనున్నట్లు TJS తెలిపింది. నూతన కార్యవర్గంతో సంస్థాగతంగా పార్టీని మరింత బలోపేతం చేసేందుకు చర్యలు కొనసాగనున్నాయి.