D News: Sept 18: ఫైర్ సర్వీసెస్లో 147 డ్రైవర్ ఆపరేటర్ పోస్టులు
ఆంధ్రప్రదేశ్ రాష్ట్ర ఫైర్ సర్వీసెస్ శాఖలో ఖాళీగా ఉన్న 147 డ్రైవర్ ఆపరేటర్ పోస్టుల భర్తీకి రాష్ట్ర స్థాయి పోలీస్ నియామక మండలి (SLPRB) ప్రకటన విడుదల చేసింది. ఈ ఉద్యోగాలకు సంబంధించిన ఆన్లైన్ దరఖాస్తుల స్వీకరణ తేదీలు, పరీక్ష తేదీలు, వయోపరిమితి, విద్యార్హతలు, ఎంపిక విధానం తదితర పూర్తి వివరాలతో కూడిన షెడ్యూల్ను బోర్డు త్వరలో వెల్లడించనుంది. ఈ నియామకం రాష్ట్రంలోని నిరుద్యోగ యువతకు ఉద్యోగ అవకాశాన్ని కల్పించనుంది.
ఎంపిక విధానంలో మార్పులు
డ్రైవర్ ఆపరేటర్ పోస్టుల ఎంపిక ప్రక్రియలో ఈసారి కీలక మార్పులు చేశారు. గతంలో ఈ పోస్టులకు ప్రధానంగా ఫిజికల్ మెజర్మెంట్ (శారీరక కొలతల) పరీక్షలు నిర్వహించేవారు. అయితే తాజా నియామక ప్రక్రియలో ఎంపిక విధానాన్ని మరింత విస్తృతంగా రూపొందించారు.
రాత పరీక్షతో పాటు దేహదారుఢ్య పరీక్షలు
కొత్త రిక్రూట్మెంట్లో అభ్యర్థులకు ఫిజికల్ ఎఫిషియన్సీ టెస్ట్ (దేహదారుఢ్య పరీక్ష)తో పాటు రాత పరీక్షను కూడా తప్పనిసరి చేశారు. దీంతో అభ్యర్థుల శారీరక సామర్థ్యంతో పాటు వారి విద్యా పరిజ్ఞానాన్ని కూడా పరీక్షించనున్నారు. రాత పరీక్ష, దేహదారుఢ్య పరీక్షలకు సంబంధించిన పూర్తి వివరాలను అధికారిక షెడ్యూల్లో వెల్లడించనున్నారు.
ఇదిలా ఉండగా, రాష్ట్రంలో ఇప్పటికే ఆంధ్రప్రదేశ్ పబ్లిక్ సర్వీస్ కమిషన్ (APPSC) ద్వారా 892 పోస్టులకు, పోలీస్ శాఖలో 2,050 ఉద్యోగాలకు నోటిఫికేషన్లు వెలువడిన విషయం తెలిసిందే. తాజాగా ఫైర్ సర్వీసెస్ శాఖలో 147 డ్రైవర్ ఆపరేటర్ పోస్టుల భర్తీకి ప్రకటన విడుదల కావడంతో ప్రభుత్వ ఉద్యోగాల కోసం ఎదురుచూస్తున్న అభ్యర్థులకు మరిన్ని అవకాశాలు అందుబాటులోకి వచ్చాయి.