
YCH World Sailing Award: యాట్ క్లబ్ ఆఫ్ హైదరాబాద్ (YCH) అంతర్జాతీయ స్థాయిలో అరుదైన ఘనత సాధించింది. ప్రతిష్ఠాత్మక వరల్డ్ సెయిలింగ్ ఎలెవన్త్ అవర్ రేసింగ్ ఇంపాక్ట్ అవార్డును గెలుచుకుని భారతదేశంలో ఈ పురస్కారం అందుకున్న తొలి క్లబ్గా చరిత్ర సృష్టించింది. చైనాలోని కింగ్డావోలో జరిగిన వరల్డ్ సెయిలింగ్ అవార్డుల వేడుకలో క్లబ్ అధ్యక్షుడు సుహైమ్ షేక్ ఈ పురస్కారాన్ని అందుకున్నారు.
హైదరాబాద్ క్రీడారంగానికి అంతర్జాతీయ స్థాయిలో మరో అరుదైన గుర్తింపు లభించింది. యాట్ క్లబ్ ఆఫ్ హైదరాబాద్ (YCH) తన సేవలు, ప్రతిభావంతులైన క్రీడాకారులను తీర్చిదిద్దుతున్న విధానంతో ప్రపంచస్థాయి పురస్కారాన్ని సొంతం చేసుకుంది. ప్రపంచ సెయిలింగ్ రంగంలో ప్రతిష్ఠాత్మకంగా భావించే ఎలెవన్త్ అవర్ రేసింగ్ ఇంపాక్ట్ అవార్డును గెలుచుకుంది.
ఈ విజయంతో భారత సెయిలింగ్ చరిత్రలో యాట్ క్లబ్ ఆఫ్ హైదరాబాద్ ప్రత్యేక స్థానాన్ని సంపాదించింది. ఈ అవార్డును అందుకున్న తొలి భారతీయ క్లబ్గా నిలవడం విశేషం. చైనాలోని కింగ్డావోలో నిర్వహించిన వరల్డ్ సెయిలింగ్ అవార్డుల కార్యక్రమంలో వైసీహెచ్ అధ్యక్షుడు సుహైమ్ షేక్ పురస్కారాన్ని అందుకున్నారు.
2009లో ప్రారంభమై.. అంతర్జాతీయ గుర్తింపు వరకు
యాట్ క్లబ్ ఆఫ్ హైదరాబాద్ 2009లో ఏర్పాటైంది. ప్రారంభం నుంచి సెయిలింగ్ క్రీడను ప్రోత్సహించడంతో పాటు ప్రతిభ ఉన్న యువ క్రీడాకారులను గుర్తించి వారికి శిక్షణ అందించడంపై ప్రత్యేక దృష్టి పెట్టింది. ముఖ్యంగా ఆర్థికంగా వెనుకబడిన కుటుంబాలకు చెందిన చిన్నారులకు అన్ని రకాల సౌకర్యాలతో ఉచిత శిక్షణ అందిస్తోంది.
క్రీడలపై ఆసక్తి, ప్రతిభ ఉన్నప్పటికీ ఆర్థిక పరిస్థితుల కారణంగా శిక్షణ పొందలేని చిన్నారులకు వైసీహెచ్ అండగా నిలుస్తోంది. వారికి అవసరమైన శిక్షణ, సదుపాయాలు కల్పిస్తూ జాతీయ, అంతర్జాతీయ పోటీల్లో పాల్గొనే స్థాయికి తీర్చిదిద్దుతోంది.
332 జాతీయ, 29 అంతర్జాతీయ పతకాల ఘనత
క్లబ్ అందిస్తున్న శిక్షణకు ఫలితంగా క్రీడాకారులు అనేక విజయాలు సాధించారు. ఇప్పటివరకు 332 జాతీయ పతకాలు, 29 అంతర్జాతీయ పతకాలను గెలుచుకున్నట్లు వైసీహెచ్ అధ్యక్షుడు సుహైమ్ షేక్ వెల్లడించారు.
పేద కుటుంబాలకు చెందిన చిన్నారులకు ఉచితంగా శిక్షణ అందిస్తూ వారిని అంతర్జాతీయ స్థాయి క్రీడాకారులుగా తీర్చిదిద్దడం క్లబ్ సాధించిన ముఖ్యమైన విజయంగా నిలిచింది. ప్రతిభకు ఆర్థిక పరిస్థితులు అడ్డంకి కాకూడదనే లక్ష్యంతో వైసీహెచ్ పనిచేస్తోందని ఆయన వివరించారు.
భారత సెయిలింగ్కు కొత్త గుర్తింపు
ప్రపంచ స్థాయిలో లభించిన ఈ పురస్కారం యాట్ క్లబ్ ఆఫ్ హైదరాబాద్ కృషికి దక్కిన గుర్తింపుగా నిలిచింది. ముఖ్యంగా చిన్నారులకు ఉచిత శిక్షణ అందించడం, క్రీడా అవకాశాలను విస్తరించడం వంటి కార్యక్రమాలకు అంతర్జాతీయంగా ప్రశంసలు లభించాయి.
ఈ అవార్డు హైదరాబాద్తో పాటు భారత సెయిలింగ్ క్రీడకు కూడా గర్వకారణంగా మారింది. భవిష్యత్తులో మరింత మంది యువ క్రీడాకారులను ప్రోత్సహించి అంతర్జాతీయ స్థాయిలో దేశానికి మరిన్ని పతకాలు అందించడమే లక్ష్యంగా వైసీహెచ్ ముందుకు సాగుతోంది.
