D News: హైదరాబాద్‌లో సినిమా షూటింగ్స్ మళ్లీ జోరందుకున్నాయి. ఒకే సమయంలో పలువురు స్టార్ హీరోల సినిమాల చిత్రీకరణ నగరంలోని వివిధ ప్రాంతాల్లో జరుగుతుండటంతో ఫిల్మ్ హబ్ సందడిగా మారింది. చిరంజీవి నుంచి ప్రభాస్, మహేశ్ బాబు, గోపీచంద్, శర్వానంద్ వరకు పలువురు హీరోల సినిమాలు ప్రస్తుతం హైదరాబాద్‌లో షూటింగ్ జరుపుకుంటున్నాయి.
మెగాస్టార్ చిరంజీవి నటిస్తున్న ‘కాకా’ సినిమా చిత్రీకరణ సిటీ కాలేజీలో జరుగుతోంది. ప్రభాస్ హీరోగా తెరకెక్కుతున్న ‘ఫౌజీ’ షూటింగ్ అజీజ్‌నగర్‌లో కొనసాగుతోంది. ఈ సినిమాపై ఇప్పటికే భారీ అంచనాలు ఉండగా.. చిత్రీకరణ కూడా వేగంగా జరుగుతున్నట్లు తెలుస్తోంది.
మహేశ్ బాబు, ఎస్‌ఎస్ రాజమౌళి కాంబినేషన్‌లో రూపొందుతున్న ‘వారణాసి’ షూటింగ్ శంషాబాద్ పరిసరాల్లో జరుగుతోంది. భారీ స్థాయిలో తెరకెక్కుతున్న ఈ సినిమాకు సంబంధించిన కీలక సన్నివేశాలను హైదరాబాద్‌లో చిత్రీకరిస్తున్నారు.
మరోవైపు గోపీచంద్ నటిస్తున్న ‘సింగ’ సినిమా షూటింగ్ గచ్చిబౌలిలోని అల్యూమినియం ఫ్యాక్టరీలో జరుగుతోంది. శర్వానంద్ నటిస్తున్న ‘భోగి’ చిత్రీకరణ ముచ్చింతల్‌లో కొనసాగుతోంది. శ్రీ విష్ణు, రామ్ అబ్బరాజు కాంబినేషన్‌లో తెరకెక్కుతున్న సినిమా షూటింగ్ శంకర్‌పల్లిలో జరుగుతోంది.
ఇక పాన్ ఇండియా స్థాయిలో తెరకెక్కుతున్న ‘జై హనుమాన్’ చిత్రీకరణ రామోజీ ఫిల్మ్ సిటీలో జరుగుతోంది. సాయిధరమ్ తేజ్ నటిస్తున్న ‘సంభరాల ఏటిగట్టు (SYG)’ సినిమా షూటింగ్ కూడా శంకర్‌పల్లిలో కొనసాగుతోంది.
ఇలా హైదరాబాద్‌లోని సిటీ కాలేజీ, అజీజ్‌నగర్, శంషాబాద్, గచ్చిబౌలి, ముచ్చింతల్, శంకర్‌పల్లి, రామోజీ ఫిల్మ్ సిటీ వంటి ప్రాంతాల్లో వరుస షూటింగ్స్ జరుగుతున్నాయి. దీంతో నగరంలో ఎక్కడ చూసినా సినిమా సందడి కనిపిస్తోంది. స్టార్ హీరోల సినిమాలు ఒకేసారి చిత్రీకరణ జరుపుతుండటంతో హైదరాబాద్ మరోసారి తెలుగు సినిమా షూటింగ్స్‌కు ప్రధాన కేంద్రంగా నిలుస్తోంది.