D News: Aug 11: వైసీపీ నేతల వ్యవహార శైలిపై ఆంధ్రప్రదేశ్ రాష్ట్ర హోంమంత్రి వంగలపూడి అనిత తీవ్ర స్థాయిలో విరుచుకుపడ్డారు. నకిలీ పోలీసు వేషధారణలతో ర్యాలీలు నిర్వహించడం ద్వారా ప్రజలకు ఎలాంటి సందేశం ఇవ్వాలనుకుంటున్నారని ఆమె ప్రశ్నించారు. పోలీసు వ్యవస్థ గౌరవం, విశ్వసనీయతను దెబ్బతీసేలా ఎవరైనా వ్యవహరిస్తే కఠిన చర్యలు తప్పవని హోంమంత్రి స్పష్టం చేశారు.
వైసీపీ నేతలు పూర్తిస్థాయిలో క్రిమినల్ రాజకీయాలకు పాల్పడుతున్నారని అనిత తీవ్ర ఆరోపణలు చేశారు. వైసీపీని “గొడ్డలి పార్టీ”గా అభివర్ణించిన ఆమె.. ఆ పార్టీ నేతలకు ప్రజాస్వామ్యంలో, రాజకీయాల్లో కొనసాగేందుకు కనీస అర్హత కూడా లేదని వ్యాఖ్యానించారు. ప్రజల్లో భయాందోళనలు కలిగించేలా వ్యవహరించడం సరికాదని ఆమె అన్నారు.
శాంతిభద్రతల పరిరక్షణలో కీలకమైన పోలీసు వ్యవస్థను, పోలీసు యూనిఫాం పవిత్రతను దెబ్బతీసేలా నకిలీ పోలీసులతో ర్యాలీలు నిర్వహించడం పూర్తిగా బాధ్యతారాహిత్యమని హోంమంత్రి పేర్కొన్నారు. పోలీసులపై ప్రజలకు ఉన్న నమ్మకాన్ని దెబ్బతీసే ప్రయత్నాలను ఎట్టి పరిస్థితుల్లోనూ సహించబోమని స్పష్టం చేశారు.
రక్షక భటుల ప్రతిష్టకు భంగం కలిగించేలా ఎవరైనా వ్యవహరించినా, ఎంతటి వారైనా సరే చట్టపరంగా కఠిన పరిణామాలను ఎదుర్కోవాల్సి ఉంటుందని అనిత హెచ్చరించారు. నకిలీ పోలీసు వేషధారణలు, పోలీసు వ్యవస్థను అవమానించే చర్యలపై అధికారులు చట్ట ప్రకారం చర్యలు తీసుకుంటారని ఆమె స్పష్టం చేశారు.