D Spiritual: Sept 28: పితృ పక్షం ప్రారంభమైన నేపథ్యంలో పూర్వీకులను స్మరించుకుంటూ పిండప్రదానం, శ్రాద్ధ కర్మలు నిర్వహించడం ఆనవాయితీగా వస్తోంది. సాధారణంగా మరణించిన వారి ఆత్మశాంతి కోసం కుటుంబ సభ్యులు పిండప్రదానం చేస్తుంటారు. అయితే బిహార్‌లోని ఓ ఆలయంలో మాత్రం బతికి ఉన్నవారికి కూడా పిండప్రదానం చేసే ప్రత్యేక ఆచారం కొనసాగుతోంది.
బిహార్‌లోని గయ జిల్లాలో భస్మకూట పర్వతంపై ఉన్న జనార్ధన్ ఆలయానికి ఎంతో ప్రాధాన్యత ఉంది. ఈ ఆలయంలో విష్ణుమూర్తిని జనార్ధనుడి రూపంలో పూజిస్తారు. భక్తులు స్వామివారిని దర్శించుకుని ప్రత్యేక పూజలు నిర్వహిస్తుంటారు. సాధారణ రోజుల్లోనూ భక్తులతో సందడిగా ఉండే ఈ ఆలయం పితృ పక్షం సమయంలో మరింత రద్దీగా మారుతుందని చెబుతున్నారు.
ఈ ఆలయంలో పితృ పక్షం సందర్భంగా బతికి ఉన్న వ్యక్తికి కూడా పిండప్రదానం చేయడం ప్రత్యేకతగా చెప్పుకుంటారు. కొందరు తమకు తామే పిండప్రదానం చేసుకుంటారని స్థానికులు చెబుతున్నారు. ఇలా జీవించి ఉండగానే తమకు తామే పిండప్రదానం చేసుకుంటే మరణానంతరం మోక్షం లభిస్తుందనే విశ్వాసం అక్కడి ప్రజల్లో ఉంది.
జీవించి ఉండగానే పిండప్రదానం చేసిన వ్యక్తికి, మరణానంతరం కుటుంబ సభ్యులు ప్రత్యేకంగా పిండప్రదానం చేయాల్సిన అవసరం ఉండదనే మతపరమైన నమ్మకం కూడా ఉన్నట్లు చెబుతున్నారు. ఈ విశ్వాసంతో పితృ పక్షం సమయంలో అనేక మంది జనార్ధన్ ఆలయానికి చేరుకుని తమ బంధువులకు లేదా తమకు తామే పిండప్రదానం చేసుకుంటుంటారు.
ముఖ్యంగా సంతానం లేదా వారసులు లేని వారు, సన్యాసం స్వీకరించిన వారు జీవించి ఉన్నప్పుడే ఇక్కడ తమకు తామే పిండప్రదానం చేసుకుంటారని స్థానికులు చెబుతున్నారు. గత కొన్ని సంవత్సరాలుగా ఈ ఆచారం కొనసాగుతోందని పేర్కొంటున్నారు. పితృ పక్షంలో జనార్ధన్ ఆలయంలో కనిపించే ఈ ప్రత్యేక సంప్రదాయం భక్తుల దృష్టిని ఆకర్షిస్తోంది.