D Spiritual: Aug 19: కరీంనగర్ మున్సిపల్ కార్పొరేషన్ పరిధిలో ఏర్పాటు చేసే వినాయక మండపాలకు ఉచిత విద్యుత్ అందించనున్నట్లు కేంద్ర హోంశాఖ సహాయ మంత్రి బండి సంజయ్ కుమార్ వెల్లడించారు. ఈ మండపాలకు సంబంధించిన విద్యుత్ బిల్లుల మొత్తాన్ని కరీంనగర్ నగరపాలక సంస్థ భరిస్తుందని ఆయన స్పష్టం చేశారు.
కరీంనగర్ నగర పరిధిలో ఏటా దాదాపు 2,000 గణేష్ మండపాలు ఏర్పాటు అవుతాయని బండి సంజయ్ తెలిపారు. వీటికి అయ్యే విద్యుత్ ఛార్జీలను ఇకపై కార్పొరేషన్ చెల్లించనుందని చెప్పారు. గత మూడేళ్లుగా ఈ విద్యుత్ ఛార్జీలను తానే సొంతంగా చెల్లించినట్లు ఆయన పేర్కొన్నారు.
కరీంనగర్ 21వ డివిజన్ విద్యానగర్లోని శ్రీరాంనగర్ కాలనీలో రూ.1 కోటి మున్సిపల్ సాధారణ నిధులతో చేపట్టనున్న సీసీ రోడ్డు, డ్రెయిన్ నిర్మాణ పనులకు బండి సంజయ్ శంకుస్థాపన చేశారు. మేయర్ కొలగాని శ్రీనివాస్, డిప్యూటీ మేయర్ సునీల్ రావు, కార్పొరేషన్ కమిషనర్ ప్రపుల్ దేశాయ్లతో కలిసి ఆయన ఈ కార్యక్రమంలో పాల్గొన్నారు.
కరీంనగర్ పార్లమెంట్ నియోజకవర్గ పరిధిలో ఇప్పటివరకు రూ.22,000 కోట్ల అభివృద్ధి నిధులు తీసుకువచ్చినట్లు బండి సంజయ్ తెలిపారు. ఇందులో రూ.5,000 కోట్లు జాతీయ రహదారుల నిర్మాణానికి కేటాయించినట్లు వివరించారు. కేంద్ర ప్రభుత్వంలో 100 రోజుల్లోనే రూ.840 కోట్ల యూసీఎఫ్ నిధులు సాధించినట్లు చెప్పారు.
స్మార్ట్ సిటీ పథకం కింద రూ.940 కోట్ల నిధులతో కరీంనగర్ పట్టణాన్ని సమగ్రంగా అభివృద్ధి చేసినట్లు బండి సంజయ్ పేర్కొన్నారు. నగర అభివృద్ధికి అవసరమైన మరిన్ని నిధులను తీసుకువచ్చేందుకు కృషి చేస్తున్నట్లు తెలిపారు.
ఎన్నికల వరకు మాత్రమే రాజకీయాలు ఉండాలని, ఎన్నికల అనంతరం ప్రజల అభివృద్ధే ప్రధాన లక్ష్యంగా ప్రజాప్రతినిధులంతా కలిసికట్టుగా పనిచేయాలని బండి సంజయ్ పిలుపునిచ్చారు. రాజకీయాలకు అతీతంగా కరీంనగర్ అభివృద్ధికి అందరూ కలిసి కృషి చేయాలని సూచించారు.