D Educt: Oct 10: వనపర్తి: హాస్టల్‌లో భోజనం వికటించి 50 మంది విద్యార్థినులకు అస్వస్థత
తెలంగాణలోని వనపర్తి జిల్లాలో హాస్టల్‌లో భోజనం వికటించిందనే అనుమానంతో పలువురు విద్యార్థినులు అస్వస్థతకు గురయ్యారు. పెబ్బేరు పట్టణంలోని ప్రభుత్వ మహిళా పాలిటెక్నిక్ కళాశాల హాస్టల్‌లో బుధవారం రాత్రి చికెన్ తిన్న తర్వాత సుమారు 40 నుంచి 50 మంది విద్యార్థినులు అనారోగ్యానికి గురైనట్లు సమాచారం. దీంతో వారిని చికిత్స నిమిత్తం ఆస్పత్రికి తరలించారు.
వైరల్ ఫీవర్ అంటూ కప్పిపుచ్చే ప్రయత్నం?
విద్యార్థినులు అస్వస్థతకు గురైన ఘటనను హాస్టల్ వార్డెన్ వైరల్ ఫీవర్‌గా పేర్కొంటూ అసలు విషయం బయటకు రాకుండా ప్రయత్నించినట్లు ఆరోపణలు వెల్లువెత్తాయి. ఈ విషయం తెలుసుకున్న స్థానిక మున్సిపల్ ఛైర్మన్ శ్రీనివాస్ గౌడ్‌తో పాటు పలువురు నాయకులు కళాశాలను సందర్శించి పరిస్థితిని పరిశీలించారు.
అంబులెన్స్ లేక కారులో ఆస్పత్రికి తరలింపు
అస్వస్థతకు గురైన విద్యార్థినులను ఆస్పత్రికి తరలించే సమయంలో అంబులెన్స్ అందుబాటులో లేకపోవడంతో ఇబ్బందులు ఎదురయ్యాయి. ఈ క్రమంలో ఓ విద్యార్థినిని మున్సిపల్ ఛైర్మన్ శ్రీనివాస్ గౌడ్ తన కారులో ప్రాథమిక ఆరోగ్య కేంద్రానికి తీసుకెళ్లారు. మరోవైపు, తమ పిల్లల ఆరోగ్య పరిస్థితిపై తల్లిదండ్రులు ఆందోళన వ్యక్తం చేస్తున్నారు.
బాధ్యులపై చర్యలు తీసుకోవాలని డిమాండ్
హాస్టల్‌లో విద్యార్థినులు అస్వస్థతకు గురైన ఘటనపై సమగ్ర విచారణ జరిపించాలని స్థానికులు కోరుతున్నారు. విద్యార్థినుల ఆరోగ్యం విషయంలో నిర్లక్ష్యంగా వ్యవహరించిన వారిపై కఠిన చర్యలు తీసుకోవాలని డిమాండ్ చేస్తున్నారు.