DNews: Dec31: ద్రాక్షారామం లోని ప్రసిద్ధ పంచారామ క్షేత్రంలో శివలింగాన్ని ధ్వంసం చేసిన కేసులో నిందితుడిని పోలీసులు అరెస్టు చేశారు. అతన్ని తోటపేటకు చెందిన శీలం శ్రీనివాస్ గా గుర్తించారు. కేసు వివరాలను డాక్టర్ బిఆర్ అంబేద్కర్ కోనసీమ జిల్లా ఎస్పీ రాహుల్ మీనా వెల్లడించారు. డ్రైనేజీ వివాదం నేపథ్యంలో ఆలయ సిబ్బందికి ఇబ్బంది కలిగించాలనే ఉద్దేశ్యంతో నిందితుడు ఈ దుశ్చర్యకు పాల్పడ్డాడని ఆయన అన్నారు.
కోనసీమ జిల్లా ద్రాక్షారామం లోని ద్రాక్షారామ భీమేశ్వర ఆలయంలో ఉత్తర గోపురం, సప్త గోదావరి ఒడ్డున ఉన్న కపాలీశ్వర స్వామి లింగాన్ని నిందితులు సోమవారం అర్ధరాత్రి ధ్వంసం చేశారు. మంగళవారం ఉదయం స్థానికులు చూసినప్పుడు ఈ విషయం వెలుగులోకి వచ్చింది. సమాచారం అందుకున్న జిల్లా ఎస్పీ ధ్వంసమైన శివలింగాన్ని పరిశీలించడానికి వెళ్లారు. క్లూస్ టీం, డాగ్ స్క్వాడ్ మరియు ఫోరెన్సిక్ నిపుణులు ఆధారాలు సేకరించారు. సంఘటన స్థలంలో సీసీటీవీ కెమెరాలు లేకపోవడంతో, చుట్టుపక్కల ప్రాంతంలోని కెమెరాల ఫుటేజీని విశ్లేషించారు. ఈ ప్రక్రియలో, నిందితుడిని గుర్తించి అరెస్టు చేశారు.