D Spiritual: Nov 21: అయోధ్య: ఉత్తరప్రదేశ్‌లోని అయోధ్య శ్రీరామ జన్మభూమి మందిరానికి భక్తుల రాక భారీగా కొనసాగుతోంది. పరిక్రమ యాత్రను పూర్తి చేసుకున్న భక్తులు శ్రీరామలాలాను దర్శించుకునేందుకు ఆలయానికి తరలివస్తున్నారు. శ్రీరామ జన్మభూమి తీర్థ క్షేత్ర ట్రస్ట్ వెల్లడించిన వివరాల ప్రకారం, ఈ వారం ఇప్పటివరకు సుమారు రెండు లక్షల మంది భక్తులు స్వామివారిని దర్శించుకున్నారు.

గురువారం పరిక్రమ యాత్ర ముగియడంతో అయోధ్య నగరం భక్తుల రాకపోకలతో సందడిగా మారింది. దేశంలోని వివిధ ప్రాంతాల నుంచి వచ్చిన భక్తులు జై శ్రీరామ్ నినాదాలతో ఆలయ పరిసరాలను మార్మోగిస్తున్నారు. క్యూలైన్లలో వేచి ఉండి భక్తిశ్రద్ధలతో శ్రీరామలాలాను దర్శించుకుంటున్నారు.

సరయూ నదీ తీరాలు, ప్రాచీన ఆలయాలు, పవిత్ర వనాలు, గుప్తార్ ఘాట్ మీదుగా పరిక్రమ యాత్ర సాగిన అనంతరం శ్రీరామలాలా దర్శనం చేసుకోవడం భక్తులకు ప్రత్యేక ఆధ్యాత్మిక అనుభూతిని కలిగిస్తోందని ట్రస్ట్ తన పత్రికా ప్రకటనలో పేర్కొంది.

భక్తుల రద్దీని దృష్టిలో ఉంచుకుని ఆలయ అధికారులు, భద్రతా బలగాలు విస్తృత ఏర్పాట్లు చేపట్టాయి. భక్తులకు ఎలాంటి ఇబ్బందులు కలగకుండా ఆలయ ప్రాంగణంతో పాటు నగరంలోని ప్రధాన ప్రాంతాల్లో కట్టుదిట్టమైన భద్రతా చర్యలు అమలు చేస్తున్నారు. రద్దీని నియంత్రిస్తూ దర్శన ప్రక్రియ సజావుగా సాగేలా అధికారులు నిరంతరం పర్యవేక్షిస్తున్నారు.

Leave a Reply

Your email address will not be published. Required fields are marked *