D News: Sept 9: తెలంగాణ పోలీసు ఉద్యోగాలకు దరఖాస్తు గడువు పొడిగింపు
తెలంగాణ పోలీసు నియామక మండలి చేపట్టిన ఉద్యోగాల దరఖాస్తు గడువును పొడిగించింది. సెప్టెంబర్ 9తో ముగియాల్సిన దరఖాస్తుల గడువును సెప్టెంబర్ 16 వరకు పొడిగిస్తున్నట్లు నియామక మండలి ఛైర్మన్ వి.వి. శ్రీనివాసరావు తెలిపారు. ఈ మేరకు సెప్టెంబర్ 8న ప్రకటన విడుదల చేశారు.
రాష్ట్రంలోని పోలీసు, స్పెషల్ ప్రొటెక్షన్ ఫోర్స్, అగ్నిమాపక-విపత్తు నిర్వహణ, జైళ్ల శాఖల్లో మొత్తం 7,437 పోస్టుల భర్తీకి జూలై 29న నియామక మండలి నాలుగు వేర్వేరు నోటిఫికేషన్లు విడుదల చేసింది. ఈ పోస్టులకు ఆగస్టు 19 నుంచి ఇప్పటివరకు 3,38,336 మంది రిజిస్ట్రేషన్ చేసుకున్నారు. వీరిలో సుమారు 25 శాతం మంది మహిళా అభ్యర్థులు ఉన్నారు.
రిజిస్ట్రేషన్ చేసుకున్న వారిలో 2,88,530 మంది ఫీజు చెల్లించగా, 2,76,085 మంది దరఖాస్తులను కూడా సమర్పించారు. దరఖాస్తుదారుల్లో సుమారు 95 శాతం మందికి ఆధార్ పరిశీలన ప్రక్రియ పూర్తయినట్లు నియామక మండలి వెల్లడించింది.
ఈ నియామకాల్లో తొలిసారిగా ఎస్సీ రిజర్వేషన్లో గ్రూప్-1, గ్రూప్-2, గ్రూప్-3 వర్గీకరణను అమలు చేస్తున్నట్లు శ్రీనివాసరావు తెలిపారు. ఇప్పటికే రిజిస్ట్రేషన్ చేసుకున్న అభ్యర్థులు ఫీజు చెల్లించి తమ దరఖాస్తు ప్రక్రియను పూర్తిచేసుకోవాలని సూచించారు.
మరింత మంది అభ్యర్థులకు అవకాశం కల్పించాలన్న ఉద్దేశంతో దరఖాస్తు గడువును సెప్టెంబర్ 16 సాయంత్రం 5 గంటల వరకు పొడిగించినట్లు తెలిపారు. అభ్యర్థులు చివరి నిమిషం వరకు వేచి ఉండకుండా ముందుగానే దరఖాస్తు ప్రక్రియను పూర్తి చేసుకోవాలని సూచించారు. చివరి నిమిషంలో దరఖాస్తు చేసుకునే సమయంలో సాంకేతిక సమస్యలు ఎదురయ్యే అవకాశం ఉందని శ్రీనివాసరావు హెచ్చరించారు.