DET:DEC 05:
DDLJ 30 ఏళ్లు లండన్లో రాజ్-సిమ్రన్ భారీ విగ్రహాన్ని ఆవిష్కరించిన షారూఖ్, కాజోల్:
బాలీవుడ్ చరిత్రలో ఒక అద్భుతమైన ప్రేమకథగా నిలిచిపోయిన దిల్వాలే దుల్హనియా లే జాయేంగే సినిమా విడుదలైన 30 ఏళ్లు పూర్తయిన సందర్భంగా దానిని గుర్తు చేసుకుంటూ లండన్లో ప్రత్యేకమైన కార్యక్రమాన్ని నిర్వహించారు. ఈ ఐకానిక్ సినిమాలోని రాజ్, సిమ్రన్ పాత్రల జీవిత-పరిమాణంలో ఉన్న కాంస్య విగ్రహాన్ని ఆ సినిమా హీరో హీరోయిన్లు షారూఖ్ ఖాన్ మరియు కాజోల్ ఆవిష్కరించారు.
లండన్ లెస్టర్ స్క్వేర్లో ప్రత్యేక గౌరవం:
ఈ విగ్రహాన్ని లండన్లోని ఎంతో పేరుగాంచిన లెస్టర్ స్క్వేర్ వద్ద ఏర్పాటు చేశారు. DDLJ సినిమా 30 ఏళ్లు పూర్తి చేసుకున్న సందర్భంగా, చిత్ర దర్శకుడు ఆదిత్య చోప్రాకు అరుదైన గౌరవం దక్కింది. ఈ విగ్రహం ‘Scenes in the Square’ అనే ప్రసిద్ధ ఆర్ట్ ట్రైల్లో భాగమైంది.ఈ ఘనత సాధించిన మొట్టమొదటి భారతీయ సినిమా కావడం విశేషం. ప్రపంచ సినిమా చరిత్రలో లెస్టర్ స్క్వేర్లో ఈ గౌరవం పొందిన హ్యారీ పోటర్, మేరీ పాపిన్స్ వంటి హాలీవుడ్ ప్రముఖ పాత్రల సరసన ఇప్పుడు రాజ్, సిమ్రన్ విగ్రహం నిలబడింది.
విగ్రహ ఆవిష్కరణ కార్యక్రమం:
విగ్రహ ఆవిష్కరణ కోసం షారూఖ్ ఖాన్, కాజోల్ ప్రత్యేకంగా లండన్ వెళ్లారు. ఈ కార్యక్రమంలో షారూఖ్ క్లాసిక్ బ్లాక్ సూట్లో మెరిసిపోగా, కాజోల్ అద్భుతమైన నీలం రంగు చీరలో కనిపించారు. ఈ కాంస్య విగ్రహం సినిమాలో అత్యంత ప్రజాదరణ పొందిన, ప్రేమకు ప్రతీకగా నిలిచిన ఓ పోజ్ను పోలి ఉంది. విగ్రహం పక్కనే నిలబడి షారూఖ్, కాజోల్ కూడా అదే పోజులో ఫొటోలకు ఫోజులిచ్చారు. దీనికి సంబంధించిన ఫొటోలు, వీడియోలు సోషల్ మీడియాలో చాలా వైరల్ అయ్యాయి.
షారూఖ్, కాజోల్ భావోద్వేగం:
ఈ సందర్భంగా షారూఖ్ ఖాన్ తన సంతోషాన్ని పంచుకుంటూ, సినిమాలోని తన ఐకానిక్ డైలాగ్ను గుర్తు చేశారు బడే బడే దేశో మే, ఐసీ చోటీ చోటీ బాతేఁ హోతి రెహతీ హై,సెనోరిటా! పెద్ద పెద్ద దేశాల్లో ఇలాంటి చిన్న చిన్న విషయాలు జరుగుతూనే ఉంటాయి, సెనోరిటా!DDLJ నా గుర్తింపులో ఒక భాగం. ఈ సినిమా, అలాగే నాకూ, కాజోల్కూ దక్కుతున్న ప్రేమ చూసి చాలా వినయంగా అనిపిస్తోంది అని అన్నారు.అదే విధంగా కాజోల్ కూడా తన ఆనందాన్ని వ్యక్తం చేస్తూ, 30 ఏళ్ల తర్వాత కూడా DDLJకు ఇంత ప్రేమ దొరకడం నమ్మశక్యం కాని విషయం. లండన్లో ఈ విగ్రహాన్ని ఆవిష్కరించడం చూస్తుంటే, మా చరిత్రలో ఒక భాగాన్ని మళ్లీ జీవించినట్లుగా ఉంది అని చెప్పారు.