చెన్నై సూపర్ కింగ్స్‌ ప్రధాన కోచ్‌గా సుదీర్ఘకాలం సేవలందించిన స్టీఫెన్ ఫ్లెమింగ్‌ జట్టు నుంచి తప్పుకోవడంతో ఇప్పుడు కొత్త కోచ్ ఎవరనే దానిపై ఆసక్తి నెలకొంది. ఈ క్రమంలో ఇంగ్లాండ్ మాజీ కెప్టెన్ ఇయాన్ మోర్గాన్ పేరు తెరపైకి వచ్చింది. అతడినే సీఎస్‌కే కొత్త హెడ్ కోచ్‌గా ఎంపిక చేసే అవకాశం ఉందని భారత మాజీ క్రికెటర్ రవిచంద్రన్ అశ్విన్ అభిప్రాయపడ్డాడు.
ఇయాన్ మోర్గాన్ నాయకత్వంలో ఇంగ్లాండ్ 2019 వన్డే ప్రపంచకప్‌ను గెలుచుకుంది. అలాగే 2021 ఐపీఎల్‌లో కోల్‌కతా నైట్ రైడర్స్‌ను ఫైనల్‌కు చేర్చిన అనుభవం కూడా అతడికి ఉంది. ప్రస్తుతం మోర్గాన్‌తో సీఎస్‌కే యాజమాన్యం చర్చలు జరుపుతున్నట్లు వార్తలు వస్తున్నాయని అశ్విన్ తెలిపాడు.
“సీఎస్‌కే ప్రధాన కోచ్‌గా ఇయాన్ మోర్గాన్ వచ్చే అవకాశాలు ఉన్నాయని నాకు అనిపిస్తోంది. ప్రస్తుతం అతడి పేరే ఎక్కువగా వినిపిస్తోంది. అయితే ఆయన ఈ ఏడాదే బాధ్యతలు చేపడతారా? లేక మినీ వేలం తర్వాత జట్టు నిర్మాణం పూర్తయ్యాక వస్తారా? అనేది చూడాలి. బ్రెండన్ మెకల్లమ్ కూడా పోటీలో ఉన్నప్పటికీ.. సీఎస్‌కే మోర్గాన్ వైపే మొగ్గు చూపుతుందని భావిస్తున్నాను” అని అశ్విన్ పేర్కొన్నాడు.
ధోని మరో ఏడాది కెప్టెన్‌గా ఉండాలి
ప్రస్తుతం సీఎస్‌కే క్లిష్ట పరిస్థితుల్లో ఉందని అశ్విన్ అభిప్రాయపడ్డాడు. ఇలాంటి సమయంలో ఎంఎస్ ధోని కనీసం మరో సీజన్‌ జట్టుకు నాయకత్వం వహించాలని సూచించాడు. కొత్త కోచ్‌కు జట్టుతో కలిసి పనిచేసేందుకు తగిన సమయం ఇవ్వాలని, అప్పటివరకు ధోని ముందుండటం ఉపయోగకరంగా ఉంటుందని పేర్కొన్నాడు.
ఐపీఎల్‌లో ఐదుసార్లు ఛాంపియన్‌గా నిలిచిన సీఎస్‌కే.. గత రెండు సీజన్లలో ఆశించిన స్థాయిలో రాణించలేదు. ఇటీవల ముగిసిన సీజన్‌లో ధోని ఒక్క మ్యాచ్‌లో కూడా ఆడలేదు. దీంతో వచ్చే సీజన్‌లో సీఎస్‌కే వ్యూహాలు, కెప్టెన్సీపై మరింత ఆసక్తి నెలకొంది.