DET:FEB 18:
తీహార్ జైలు నుండి విడుదల:
రూ.9 కోట్ల చెక్ బౌన్స్ కేసులో చిక్కుకున్న రాజ్‌పాల్ యాదవ్ గత 11 రోజులుగా ఢిల్లీలోని తీహార్ జైలులో శిక్ష అనుభవించారు.తన మేనకోడలు వివాహానికి హాజరయ్యేందుకు వీలుగా ఢిల్లీ హైకోర్టు ఆయనకు మార్చి 18 వరకు మధ్యంతర బెయిల్ మంజూరు చేసింది. ఈ నేపథ్యంలో ఆయన ఫిబ్రవరి 16న జైలు నుండి బయటకు వచ్చారు.
దేశం చూపిన ప్రేమాభిమానాలు:
జైలు నుండి విడుదలైన తర్వాత రాజ్‌పాల్ యాదవ్ మీడియాతో మాట్లాడుతూ భావోద్వేగానికి లోనయ్యారు.నేను బాలీవుడ్‌లో అడుగుపెట్టి 2027 నాటికి 30 ఏళ్లు పూర్తవుతాయి.ఈ ప్రయాణంలో దేశంలోని ప్రతి బిడ్డ,వృద్ధులు,యువకులు నన్ను ఎంతగానో ప్రేమించారు.నా బాలీవుడ్ కుటుంబం నాకు అండగా నిలిచింది.వారి ప్రేమ వల్లే నేను 200-250 సినిమాల్లో నటించగలిగాను అని పేర్కొన్నారు.
న్యాయస్థానంపై నమ్మకం:
తనపై వస్తున్న ఆరోపణల గురించి స్పందిస్తూ తాను ఎప్పుడూ చట్టానికి గౌరవం ఇస్తానని రాజ్‌పాల్ తెలిపారు.గత 10 ఏళ్లుగా కోర్టు ఎప్పుడు ఆదేశించినా నేను హాజరయ్యాను భవిష్యత్తులో కూడా అలాగే ఉంటాను.నాపై ఏవైనా ఆరోపణలు ఉంటే సమాధానం చెప్పడానికి నేను సిద్ధంగా ఉన్నాను.నాకు న్యాయం చేకూరే అవకాశం ఇచ్చినందుకు హైకోర్టుకు కృతజ్ఞతలు అని ఆయన అన్నారు.
అసలు కేసు నేపథ్యం:
ఈ వివాదం 2010లో రాజ్‌పాల్ యాదవ్ దర్శకత్వం వహించిన అతా పతా లాపతా సినిమాతో మొదలైంది.ఈ సినిమా నిర్మాణం కోసం మురళీ ప్రాజెక్ట్స్ అనే సంస్థ నుండి ఆయన రూ.5 కోట్లు అప్పు తీసుకున్నారు.అయితే సినిమా పరాజయం పాలవడంతో అప్పు తీర్చలేకపోయారు.వడ్డీతో కలిపి ఆ మొత్తం రూ.9 కోట్లకు చేరడం ఆయన ఇచ్చిన చెక్కులు బౌన్స్ కావడంతో ఈ చట్టపరమైన ఇబ్బందులు ఎదురయ్యాయి.
అండగా నిలిచిన బాలీవుడ్ ప్రముఖులు:
రాజ్‌పాల్ యాదవ్ జైలుకు వెళ్లిన సమయంలో సల్మాన్ ఖాన్,అజయ్ దేవగన్,సోనూ సూద్,వరుణ్ ధావన్ వంటి ప్రముఖులు ఆయనకు ఆర్థికంగా సాయం చేయడానికి ముందుకు వచ్చారు.సినిమా ఇండస్ట్రీలో ఆయనకు ఉన్న మంచి గుర్తింపు కారణంగా చాలా మంది నటులు మరియు దర్శకులు ఆయనకు మద్దతుగా నిలిచారు.