D NEWS: బీజేపీ జాతీయ నాయకత్వం పలు రాష్ట్రాలకు కొత్త ఇన్‌చార్జ్‌లు, సహ ఇన్‌చార్జ్‌లను నియమించింది. ఇందులో భాగంగా తెలంగాణకు సునీల్‌ బన్సల్‌ను ఇన్‌చార్జ్‌గా నియమించగా, అభయ్‌ పాటిల్‌, రేఖా శర్మకు సహ ఇన్‌చార్జ్‌ల బాధ్యతలు అప్పగించింది. పార్టీ రాష్ట్ర స్థాయి సంస్థాగత వ్యవహారాలను మరింత బలోపేతం చేసేలా ఈ మార్పులు చేపట్టారు.
తెలంగాణతో పాటు ఆంధ్రప్రదేశ్‌, తమిళనాడు రాష్ట్రాలకు కూడా కొత్త బాధ్యతలు కేటాయించారు. ఆంధ్రప్రదేశ్‌ ఇన్‌చార్జ్‌గా డాక్టర్‌ అరవింద్‌ భదౌరియాను, సహ ఇన్‌చార్జ్‌గా వనతి శ్రీనివాసన్‌ను నియమించారు. తమిళనాడు ఇన్‌చార్జ్‌గా రామ్‌ మాధవ్‌, సహ ఇన్‌చార్జ్‌లుగా నిర్మల్ కుమార్‌ సురానా, డీకే అరుణకు బాధ్యతలు ఇచ్చారు.
పలు కీలక రాష్ట్రాల్లోనూ సంస్థాగత మార్పులు జరిగాయి. ఉత్తరప్రదేశ్‌కు వినోద్‌ తావ్డే, మహారాష్ట్రకు బైజయంత్‌ పాండా, ఢిల్లీకి వినయ్‌ సహస్రబుద్ధే ఇన్‌చార్జ్‌లుగా నియమితులయ్యారు. బిహార్‌, కర్ణాటకకు హరీశ్‌ ద్వివేది, ఛత్తీస్‌గఢ్‌, హర్యానాకు స్మృతి ఇరానీ బాధ్యతలు దక్కాయి.
2027లో అసెంబ్లీ ఎన్నికలు జరగనున్న రాష్ట్రాలను దృష్టిలో పెట్టుకుని కూడా బీజేపీ సంస్థాగత బృందాలను పునర్వ్యవస్థీకరించింది. రాష్ట్రాల్లో పార్టీ కార్యకర్తలు, నాయకుల మధ్య సమన్వయం పెంచడం, సంస్థాగత కార్యక్రమాలను పర్యవేక్షించడం వంటి బాధ్యతలను కొత్త ఇన్‌చార్జ్‌లు నిర్వహించనున్నారు.
తెలంగాణలో సునీల్‌ బన్సల్‌తో పాటు ఇద్దరు సహ ఇన్‌చార్జ్‌ల నియామకం రాష్ట్ర సంస్థాగత వ్యవహారాలకు ప్రాధాన్యం ఇచ్చినట్లు చూపుతోంది. కొత్త నియామకాలు తక్షణమే అమల్లోకి వచ్చినట్లు పార్టీ ప్రకటించింది.