“మంచి అభివృద్ధి వైపు అడుగులు: ఉప ముఖ్యమంత్రి భట్టి విక్రమార్క”.

DNews: Nov 22: ఖమ్మం: ఉప ముఖ్యమంత్రి భట్టి విక్రమార్క మాట్లాడుతూ, వైరా నియోజకవర్గ కేంద్రంలో రూ.200 కోట్ల వ్యయంతో నిర్మించబడుతున్న యంగ్ ఇండియా ఇంటర్నేషనల్ మోడల్ స్కూల్ స్థాపన మంచి అభివృద్ధి అని పేర్కొన్నారు. శనివారం ఆయన వర్చువల్‌గా ఈ పాఠశాల నిర్మాణానికి శంకుస్థాపన చేశారు. అదేవిధంగా, వైరా నియోజకవర్గంలో రూ.21 కోట్ల వ్యయంతో నిర్మించబడనున్న 7 సబ్‌స్టేషన్లకు కూడా శంకుస్థాపన చేశారు. ఈ సందర్భంగా భట్టి మాట్లాడుతూ, రాష్ట్రవ్యాప్తంగా గురుకుల పాఠశాలల్లో చదువుతున్న విద్యార్థుల ఫీజులను 200 శాతం పెంచింది తమ ప్రభుత్వమేనని అన్నారు. సమాజంలోని బలహీన వర్గాలు ఉన్నత విద్య ద్వారానే ఉన్నత స్థానాలకు చేరగలవని ఆయన పేర్కొన్నారు. గత పదేళ్లుగా పాలించిన బీఆర్‌ఎస్ పార్టీ ద్వాక్రా మహిళలను మోసం చేసిందని విమర్శించారు. ద్వాక్రా మహిళలకు వడ్డీ లేని రుణాలను తమ ప్రభుత్వం అందజేసిందని తెలిపారు. రాష్ట్రంలో రూ.590 కోట్లు ఖర్చు చేసి, రేషన్ కార్డుల ద్వారా పేదలకు బియ్యం అందజేశామని, మహిళలకు ఉచిత బస్సు సౌకర్యాన్ని కూడా కల్పించామని అన్నారు. తాను పుట్టిన నేల అభివృద్ధి కోసం కట్టుబడి ఉన్నానని, ఇప్పటికే వంద పడకల ఆసుపత్రి నిర్మాణానికి శంకుస్థాపన చేశానని తెలిపారు. గతంలో రైతుల కోసం వైరా జలాశయం నుండి నీటిని విడుదల చేసినందుకు తాను జైలుకి వెళ్లిన విషయాన్ని గుర్తుచేశారు. ఈ ప్రభుత్వం రైతుల కోసం పనిచేస్తుందని, దోపిడీదారులు, దొంగల కోసం కాదని స్పష్టం చేశారు. తెలంగాణ రాష్ట్రాన్ని ప్రపంచంతో పోటీ పడేలా అభివృద్ధి పథంలో తీసుకెళ్తానని ఉప ముఖ్యమంత్రి భట్టి విక్రమార్క హామీ ఇచ్చారు.