D-News: యాపిల్ ఐఫోన్, ఇతర యాపిల్ డివైస్లను ఉపయోగిస్తున్న వారికి కీలక హెచ్చరిక జారీ చేసింది. ప్రత్యేకమైన స్పైవేర్ దాడికి గురయ్యే అవకాశం ఉన్న కొందరు వినియోగదారులకు కంపెనీ థ్రెట్ నోటిఫికేషన్లు పంపింది. ప్రపంచవ్యాప్తంగా 110 దేశాల్లో ఈ హెచ్చరికలు పంపినట్లు యాపిల్ తెలిపింది. ఇలాంటి దాడులు సాధారణ సైబర్ దాడుల కంటే చాలా అధునాతనంగా ఉంటాయి. ప్రత్యేక వ్యక్తులను లక్ష్యంగా చేసుకునే ఈ స్పైవేర్ను సాధారణంగా భారీ వనరులతో పనిచేసే నెట్వర్క్లు ఉపయోగిస్తాయి. టెక్నాలజీ రంగంలోని వ్యక్తులు, జర్నలిస్టులు, కార్యకర్తలు, రాజకీయ నాయకులు, దౌత్యవేత్తలు వంటి వారు లక్ష్యంగా మారే అవకాశం ఉంటుంది. అయితే సాధారణంగా ఎక్కువ మంది యూజర్లు ఇలాంటి దాడులకు గురయ్యే అవకాశం చాలా తక్కువగా ఉంటుందని యాపిల్ చెబుతోంది.
యాపిల్ ఎలా హెచ్చరిస్తుంది?
యూజర్ లక్ష్యంగా ఉన్నట్లు అనుమానం వచ్చినప్పుడు యాపిల్ నేరుగా సమాచారం ఇస్తుంది. ఐఫోన్ లాక్స్క్రీన్పై పుష్ నోటిఫికేషన్, Settings యాప్లో అలర్ట్, యాపిల్ అకౌంట్కు అనుసంధానమైన ఈమెయిల్ ద్వారా సమాచారం అందుతుంది. వెబ్ బ్రౌజర్లో యాపిల్ అకౌంట్లోకి లాగిన్ అయినప్పుడు కూడా హెచ్చరిక కనిపించవచ్చు. 2021 నుంచి ఇప్పటివరకు ఇలాంటి అధునాతన స్పైవేర్ దాడులపై 150కిపైగా దేశాల్లో వినియోగదారులను యాపిల్ అప్రమత్తం చేసింది.
అలర్ట్ వస్తే ఏం చేయాలి?
అలాంటి నోటిఫికేషన్ను ఎట్టి పరిస్థితుల్లోనూ నిర్లక్ష్యం చేయకూడదు. యాపిల్ సూచనల ప్రకారం ముందుగా మీ అన్ని యాపిల్ డివైస్లను తాజా సాఫ్ట్వేర్కు అప్డేట్ చేయాలి. యాపిల్ అకౌంట్కు బలమైన పాస్వర్డ్, టూ-ఫ్యాక్టర్ ఆథెంటికేషన్ తప్పనిసరిగా ఉపయోగించాలి. అలాగే ఐఫోన్లో Stolen Device Protection ఆన్ చేయడం మంచిది. తెలియని వ్యక్తుల నుంచి వచ్చే లింకులు, ఫైళ్లు, అటాచ్మెంట్లను ఓపెన్ చేయకూడదు. ఆన్లైన్లో ప్రతి ఖాతాకు ప్రత్యేకమైన బలమైన పాస్వర్డ్లు లేదా పాస్కీలు ఉపయోగించాలి.
మరింత రక్షణ కోసం Lockdown Modeను కూడా ఆన్ చేయవచ్చు. ఇందుకోసం Settings > Privacy & Security > Lockdown Mode > Turn On Lockdown Modeకు వెళ్లాలి.
Stolen Device Protection ఎలా ఆన్ చేయాలి?
Settings > Face ID & Passcode > Stolen Device Protectionలోకి వెళ్లి ఈ ఫీచర్ను ఆన్ చేయాలి.
స్పైవేర్ హెచ్చరిక వచ్చినవారు నిపుణుల సహాయం కూడా తీసుకోవాలని యాపిల్ సూచిస్తోంది. ప్రత్యేకంగా సైబర్ సెక్యూరిటీ నిపుణుల సలహా తీసుకోవడం ద్వారా ప్రమాదాన్ని తగ్గించుకోవచ్చు.:::