D Spiritual: Feb 11: పవిత్ర రంజాన్ మాసాన్ని పురస్కరించుకుని ఆంధ్రప్రదేశ్ రాష్ట్ర ప్రభుత్వం ముస్లిం ఉద్యోగులకు తీపి కబురు అందించింది. ఉపవాస దీక్షలు చేపట్టే ఉద్యోగుల సౌకర్యార్థం కార్యాలయ వేళల్లో మార్పులు చేస్తూ అధికారిక ఉత్తర్వులు జారీ చేసింది. ఈ పవిత్ర మాసంలో సాయంత్రం వేళ ఇఫ్తార్ విందు, ప్రార్థనల కోసం సమయం అవసరమని గుర్తించిన ప్రభుత్వం విధుల్లో ఒక గంట వెసులుబాటు కల్పిస్తూ సానుకూల నిర్ణయం తీసుకుంది.
ప్రభుత్వ ఆదేశాల ప్రకారం ఈనెల 18వ తేదీ నుంచి మార్చి 19వ తేదీ వరకు ఈ సడలింపు అమల్లో ఉంటుంది. కేవలం రెగ్యులర్ ఉద్యోగులకే కాకుండా ఉపాధ్యాయులు, కాంట్రాక్ట్ సిబ్బంది, ఔట్సోర్సింగ్ ఉద్యోగులు కూడా ఈ రాయితీ పరిధిలోకి వస్తారు. అదేవిధంగా స్వర్ణ వార్డు, స్వర్ణ గ్రామ ఉద్యోగులకు కూడా నిర్ణీత సమయం కంటే ఒక గంట ముందే విధులు ముగించుకునే అవకాశం కల్పించారు.
ముస్లిం సోదరులు భక్తిశ్రద్ధలతో పాటించే ఉపవాస దీక్షల దృష్ట్యా, వారు ఇళ్లకు చేరుకుని కుటుంబ సభ్యులతో కలిసి ప్రార్థనల్లో పాల్గొనేలా ఈ నిర్ణయం తీసుకున్నారు. ప్రతిరోజూ సాయంత్రం నిర్ణీత సమయం కంటే గంట ముందుగానే కార్యాలయాల నుంచి వెళ్లేందుకు అనుమతి ఉంటుంది. రాష్ట్ర ప్రభుత్వ ప్రధాన కార్యదర్శి విజయానంద్ ఈ మేరకు స్పష్టమైన ఉత్తర్వులు జారీ చేసి, అన్ని శాఖల ఉన్నతాధికారులు ఆదేశాలను కచ్చితంగా అమలు చేయాలని సూచించారు.
మత సామరస్యాన్ని ప్రతిబింబించేలా ప్రభుత్వం తీసుకున్న ఈ నిర్ణయంపై ముస్లిం ఉద్యోగ సంఘాలు హర్షం వ్యక్తం చేస్తున్నాయి. క్షేత్రస్థాయి నుంచి సచివాలయం వరకు పనిచేసే ముస్లిం ఉద్యోగులందరికీ ఈ సమయ సడలింపు వర్తిస్తుందని ప్రభుత్వం స్పష్టం చేసింది. రంజాన్ మాసం ముగిసే వరకు ఈ నిబంధన అమలులో ఉండడంతో ఉద్యోగులు వృత్తిపరమైన బాధ్యతలతో పాటు తమ మతపరమైన ఆచారాలను సులభంగా నిర్వహించుకునే వీలుంటుంది.