D Educt: Sept 10: AP Inter Exams: ప్రశ్నపత్రాల్లో కీలక మార్పులు.. బట్టీ పద్ధతికి చెక్
ఆంధ్రప్రదేశ్‌ ఇంటర్మీడియట్‌ విద్యారంగంలో సమూల మార్పులకు ప్రభుత్వం శ్రీకారం చుట్టింది. ఇంటర్‌ పరీక్షా విధానంలో కీలక సంస్కరణలు తీసుకురానున్నారు. విద్యార్థులు పాఠ్యాంశాలను కేవలం కంఠస్థం చేసి పరీక్షల్లో రాసే పద్ధతికి స్వస్తి పలికి.. వారిలో విశ్లేషణాత్మక, సృజనాత్మక ఆలోచనా శక్తిని పెంపొందించేలా పరీక్షలను రూపొందించనున్నారు.
పరాఖ్‌ మార్గదర్శకాలకు అనుగుణంగా
కేంద్ర ప్రభుత్వ పరాఖ్‌ (PARAKH) మార్గదర్శకాలకు అనుగుణంగా ఈ మార్పులను అమలు చేయనున్నారు. జాతీయ విద్యా విధానం లక్ష్యాలకు అనుగుణంగా విద్యార్థుల్లో కేవలం జ్ఞాపకశక్తికి కాకుండా.. విషయాలను అర్థం చేసుకోవడం, విశ్లేషించడం, వాటిని కొత్త పరిస్థితుల్లో అన్వయించగల సామర్థ్యానికి ప్రాధాన్యం ఇవ్వనున్నారు. దేశవ్యాప్తంగా పరీక్షా ప్రమాణాల్లో సమానత్వం తీసుకురావడమే ఈ సంస్కరణల ప్రధాన ఉద్దేశంగా అధికారులు భావిస్తున్నారు.
ప్రశ్నపత్రాల్లో 10 శాతం కొత్త తరహా ప్రశ్నలు
వచ్చే విద్యా సంవత్సరం నుంచి ఇంటర్‌ ప్రశ్నపత్రాల్లో సుమారు 10 శాతం ప్రశ్నలను వినూత్న పద్ధతిలో రూపొందించనున్నారు. విద్యార్థులు పాఠ్యాంశాలను ఎంతవరకు అర్థం చేసుకున్నారు? నేర్చుకున్న విషయాలను కొత్త పరిస్థితుల్లో ఎలా ఉపయోగించగలరు? అనే అంశాల ఆధారంగా ఈ ప్రశ్నలు ఉండనున్నాయి. దీంతో కేవలం బట్టీ పట్టి పరీక్షలు రాసే విధానానికి క్రమంగా ముగింపు పలకాలని భావిస్తున్నారు.
ప్రత్యేక క్వశ్చన్‌ బ్యాంక్‌ ఏర్పాటు
కొత్త విధానానికి అనుగుణంగా ఉపాధ్యాయుల నుంచి సేకరించిన సృజనాత్మక ప్రశ్నలతో ప్రత్యేక క్వశ్చన్‌ బ్యాంక్‌ను రూపొందించనున్నారు. ఈ ప్రశ్నలను కొత్త పాఠ్యపుస్తకాల్లోనూ అందుబాటులోకి తీసుకురానున్నారు. దీంతో విద్యార్థులు పరీక్షలకు సిద్ధమయ్యే సమయంలోనే విభిన్న రకాల ప్రశ్నలను అర్థం చేసుకుని, వాటిని విశ్లేషించే సామర్థ్యాన్ని పెంపొందించుకోవచ్చు.
విద్యార్థుల్లో నైపుణ్యాల పెంపునకు ప్రాధాన్యం
కొత్త పరీక్షా విధానం ద్వారా విద్యార్థుల్లో బట్టీ పద్ధతిపై ఆధారపడే ధోరణిని తగ్గించి.. సబ్జెక్టుపై నిజమైన అవగాహన, పట్టు సాధించేలా చేయాలని అధికారులు లక్ష్యంగా పెట్టుకున్నారు. ఆలోచించడం, విశ్లేషించడం, సమస్యలను పరిష్కరించడం, నేర్చుకున్న అంశాలను అన్వయించడం వంటి నైపుణ్యాలకు ప్రాధాన్యం ఇవ్వనున్నారు.
ఉపాధ్యాయులకు ప్రత్యేక శిక్షణ
కొత్త విధానంలో నాణ్యమైన ప్రశ్నపత్రాలను రూపొందించేందుకు ఉపాధ్యాయులకు ప్రత్యేక కార్యశాలలు నిర్వహించనున్నారు. విద్యా మండలి ఆధ్వర్యంలో సృజనాత్మక ప్రశ్నలను సేకరించి.. వాటిని కొత్త పరీక్షా విధానానికి అనుగుణంగా రూపొందించేలా శిక్షణ ఇవ్వనున్నారు. ఈ సంస్కరణలతో విద్యార్థుల్లో సృజనాత్మకత, విశ్లేషణాత్మక ఆలోచనా సామర్థ్యం మరింత పెరుగుతుందని విద్యావేత్తలు భావిస్తున్నారు.