D Spiritual: Mar 18: హిందువుల ఆరాధ్య దైవమైన అయోధ్య రామయ్య సన్నిధిలో మరో చారిత్రాత్మక ఘట్టం ఆవిష్కృతం కానుంది. మార్చి 19 నుంచి ప్రారంభమయ్యే చైత్ర నవరాత్రుల శుభసందర్భంగా శ్రీరామ జన్మభూమి ఆలయంలో అత్యంత పవిత్రమైన శ్రీరామ యంత్రాన్ని ప్రతిష్ఠించేందుకు ఏర్పాట్లు చేస్తున్నారు. ఈ వేడుకను పురస్కరించుకుని రామనగరి అయోధ్యలో ఏర్పాట్లు జోరుగా సాగుతున్నాయి.
శ్రీరామ జన్మభూమి తీర్థ క్షేత్ర ట్రస్ట్ తెలిపిన వివరాల ప్రకారం, ఈ పవిత్రమైన శ్రీరామ యంత్రాన్ని రామమందిరంలోని మూడవ అంతస్తులో ఉన్న గర్భగుడిలో ప్రతిష్ఠించనున్నారు. హిందూ నూతన సంవత్సర ప్రారంభ దినమైన చైత్ర శుక్ల ప్రతిపద రోజున ఈ వైదిక కార్యక్రమాన్ని నిర్వహించడం ప్రత్యేకతగా భావిస్తున్నారు.
ఈ దివ్య కర్మకాండను శాస్త్రోక్తంగా నిర్వహించేందుకు దేశం నలుమూలల నుంచి సుమారు 51 మంది ప్రముఖ వైదిక పండితులను ఆహ్వానించారు. ఈ చారిత్రాత్మక వేడుకలో భారత రాష్ట్రపతి ద్రౌపది ముర్ము కూడా పాల్గొననున్నారు. యంత్ర ప్రతిష్ఠకు ముందు నుంచే ఆలయ ప్రాంగణంలో తొమ్మిది రోజుల పాటు ప్రత్యేక ఆధ్యాత్మిక, మతపరమైన కార్యక్రమాలు నిర్వహిస్తున్నారు.
చైత్ర నవరాత్రుల మొదటి రోజు హిందూ సంప్రదాయంలో నూతన సంవత్సరానికి ఆరంభంగా భావిస్తారు. ఈ పవిత్రమైన రోజున రామ యంత్రాన్ని ప్రతిష్ఠించడం వల్ల ఆలయ ప్రాంగణంలో ఆధ్యాత్మిక శక్తి మరింత పెరుగుతుందని పండితులు చెబుతున్నారు. ఈ కార్యక్రమం అయోధ్య రామమందిర చరిత్రలో మరో కీలక మైలురాయిగా నిలిచిపోనుంది.