పాలిటెక్నిక్‌ విద్యార్థులకు ఉపాధి కల్పించేందుకు అదానీ సంస్థతో ఒప్పందం

D Educt: Aug 14: పాలిటెక్నిక్ విద్యార్థులకు గుడ్‌న్యూస్.. అదానీ స్కిల్స్‌తో ఉన్నత విద్యాశాఖ ఒప్పందం

రాష్ట్రంలోని పాలిటెక్నిక్ విద్యార్థులకు ఉపాధి అవకాశాలను మరింత మెరుగుపరిచేందుకు ఉన్నత విద్యాశాఖ కీలక నిర్ణయం తీసుకుంది. అదానీ స్కిల్స్, ఎడ్యుకేషన్ (ASE)తో ఉన్నత విద్యాశాఖ ఒప్పందం కుదుర్చుకుంది. ఈ భాగస్వామ్యం ద్వారా విద్యార్థులకు పరిశ్రమ అవసరాలకు అనుగుణంగా నైపుణ్య శిక్షణ అందించడంతో పాటు మెరుగైన ఉపాధి అవకాశాలను కల్పించనున్నారు.

ఈ ఒప్పందంలో భాగంగా ‘ఇండస్ట్రీ కనెక్ట్ ఇనిషియేటివ్’ కార్యక్రమాన్ని అమలు చేయనున్నారు. దీని ద్వారా పరిశ్రమలు, విద్యాసంస్థల మధ్య సహకారాన్ని మరింత బలోపేతం చేయాలని లక్ష్యంగా పెట్టుకున్నారు. విద్యార్థులకు ప్రస్తుత పరిశ్రమ అవసరాలపై అవగాహన కల్పించడంతో పాటు ఉద్యోగాలకు అవసరమైన ప్రాక్టికల్ నైపుణ్యాలను అభివృద్ధి చేయనున్నారు.

ఒప్పంద పత్రాలపై ఉన్నత విద్యాశాఖ కమిషనర్ నారాయణ భరత్ గుప్తా, అదానీ స్కిల్స్, ఎడ్యుకేషన్ చీఫ్ ఆపరేటింగ్ ఆఫీసర్ సుధన్వ కిమ్మనే సంతకాలు చేశారు. ఈ భాగస్వామ్యం ద్వారా పాలిటెక్నిక్ విద్యార్థులకు ఇంటర్న్‌షిప్‌లు, ప్రత్యేక శిక్షణ కార్యక్రమాలు, ఉద్యోగ అవకాశాలకు సంబంధించిన మార్గాలను మరింత విస్తరించనున్నారు.

ఈ కార్యక్రమం ద్వారా పరిశ్రమల్లో ప్రస్తుతం ఉన్న అవసరాలను దృష్టిలో ఉంచుకుని విద్యార్థులకు నైపుణ్యాలను అందించనున్నారు. తద్వారా కోర్సు పూర్తయ్యే సమయానికి విద్యార్థులు ఉద్యోగ మార్కెట్‌లో పోటీ పడేందుకు అవసరమైన సామర్థ్యాలను పెంపొందించుకునే అవకాశం ఉంటుంది.

ఉన్నత విద్యాశాఖ, అదానీ స్కిల్స్ అండ్ ఎడ్యుకేషన్ మధ్య కుదిరిన ఈ భాగస్వామ్యం ఐదేళ్ల పాటు కొనసాగనుంది. ఈ కాలంలో పరిశ్రమలకు అవసరమైన నైపుణ్యాలు కలిగిన మానవ వనరులను అభివృద్ధి చేయడంపై ప్రత్యేక దృష్టి సారించనున్నారు.

ఈ కార్యక్రమంలో అదానీ స్కిల్స్ అండ్ ఎడ్యుకేషన్ సీఈఓ రాబిన్ బౌమిక్, ఉన్నత విద్య జాయింట్ డైరెక్టర్ పద్మారావు, డిప్యూటీ డైరెక్టర్ ఎంఏవీ రామకృష్ణ తదితరులు పాల్గొన్నారు. ఈ భాగస్వామ్యం రాష్ట్రంలోని పాలిటెక్నిక్ విద్యార్థులకు నైపుణ్యాభివృద్ధి, ఇంటర్న్‌షిప్, ఉపాధి అవకాశాలను మరింత చేరువ చేయనుందని అధికారులు తెలిపారు.