DNews: Dec 08: హైదరాబాద్లో తెలంగాణ రైజింగ్ గ్లోబల్ సమ్మిట్-2025ను ముఖ్యమంత్రి రేవంత్ రెడ్డి ప్రభుత్వం రెండు రోజులపాటు ఘనంగా నిర్వహిస్తోంది. ఈ సమ్మిట్లో పలువురు ప్రముఖులు పాల్గొన్నారు. ఉప ముఖ్యమంత్రి మల్లూ భట్టి విక్రమార్క, సినీ నటుడు అక్కినేని నాగార్జున కారులో సమ్మిట్కు చేరుకుని, అక్కడ ఏర్పాటు చేసిన స్టాళ్లను పరిశీలించారు. అనంతరం నాగార్జున మీడియాతో మాట్లాడుతూ, తాను హైదరాబాద్లో 50 ఏళ్లుగా నివసిస్తున్నానని, ఇక్కడి వాతావరణం ఎంతో అనుకూలంగా ఉందని తెలిపారు. తెలంగాణలో అన్నపూర్ణ స్టూడియో ఉన్నదని, భవిష్యత్ సిటీలో బాలీవుడ్ ప్రముఖులు మరో స్టూడియో నిర్మించేందుకు ముందుకు రావడం మంచి అభివృద్ధి అని అన్నారు. అందరూ కలిసి పనిచేస్తే ప్రపంచ స్థాయి సౌకర్యాలతో పెద్ద నిర్మాణం సాధ్యమవుతుందని, ముఖ్యమంత్రి రేవంత్ రెడ్డి అమలు చేస్తున్న ఫ్యూచర్ సిటీ ఆలోచన చాలా మంచిదని ప్రశంసించారు. ఇదిలా ఉండగా, గవర్నర్ జిష్ణు దేవ్ వర్మ మధ్యాహ్నం 1:30 గంటలకు ఈ సమావేశాన్ని ప్రారంభించగా, ముఖ్యమంత్రి రేవంత్ రెడ్డి 2:30 గంటలకు ప్రసంగించారు. అనంతరం ఆయన సమ్మిట్ ప్రాంగణంలోని స్టాళ్లను పరిశీలించారు. ఈ సమావేశంలో నోబెల్ బహుమతి గ్రహీతలు అభిజిత్ బెనర్జీ, కైలాష్ సత్యార్థి ప్రసంగించనున్నారు. 44 దేశాల నుండి 154 మంది ప్రతినిధులు ఈ గ్లోబల్ సమ్మిట్లో పాల్గొంటున్నారు. యువతకు పెట్టుబడులు, ఉపాధి అవకాశాలు కల్పించడమే ఈ సమావేశ ప్రధాన లక్ష్యం. ముఖ్యమంత్రి రేవంత్ రెడ్డి వివిధ రంగాల ప్రతినిధులతో సమావేశమవుతారు. సమ్మిట్ ప్రాంగణంలో తెలంగాణ తల్లి డిజిటల్ విగ్రహాన్ని ఆవిష్కరించారు. ఈ కార్యక్రమంలో మంత్రులు భట్టి విక్రమార్క, శ్రీధర్ బాబు, కోమటిరెడ్డి వెంకటరెడ్డి, పొంగులేటి శ్రీనివాసరెడ్డి, కేంద్ర మంత్రి కిషన్ రెడ్డి, నటుడు నాగార్జున పాల్గొన్నారు. మొత్తం 27 సెషన్లలో వివిధ అంశాలపై చర్చలు జరగనున్నాయి.