DNews: Jan 31: గ్రేటర్ హైదరాబాద్ మున్సిపల్ కార్పొరేషన్ (GHMC) గవర్నింగ్ కౌన్సిల్ పదవీ కాలం మరో 10 రోజుల్లో ముగియనుంది. ఈ నేపథ్యంలో శనివారం ఉదయం 10:30 గంటలకు GHMC ప్రధాన కార్యాలయంలో మేయర్ గడ్వాల్ విజయలక్ష్మి అధ్యక్షతన చివరి కౌన్సిల్ సమావేశం జరగనుంది. ఈ సమావేశంలో 2026-27 ఆర్థిక సంవత్సరానికి సంబంధించిన GHMC మెగా బడ్జెట్ ఆమోదం పొందనుంది. ఈ బడ్జెట్ను GHMC పరిధిని ఔటర్ రింగ్ రోడ్ (ORR) వరకు విస్తరించిన నేపథ్యంలో రూపొందించారు. మొత్తం రూ.11,460 కోట్ల మెగా బడ్జెట్ ప్రతిపాదించబడింది. ఇందులో పాత GHMC పరిధికి రూ.9,200 కోట్లు కేటాయించగా, కొత్తగా విలీనం చేసిన 27 మున్సిపల్ కార్పొరేషన్లు మరియు మున్సిపాలిటీలకు రూ.2,260 కోట్లు కేటాయించారు. ప్రస్తుతం GHMCలో 12 జోన్లు, 60 సర్కిళ్లు, 300 వార్డులను దృష్టిలో ఉంచుకుని ఈ బడ్జెట్ సిద్ధం చేశారు. ప్రస్తుత GHMC గవర్నింగ్ కౌన్సిల్ పదవీ కాలం ఫిబ్రవరి 10న ముగుస్తుంది. ఫిబ్రవరి 11 నుంచి తెలంగాణ ప్రభుత్వం GHMCని మూడు వేర్వేరు కార్పొరేషన్లుగా విభజించనున్నట్లు ప్రకటించనుంది. ఈ నేపథ్యంలో నేడు జరగనున్న చివరి కౌన్సిల్ సమావేశానికి ప్రత్యేక ప్రాధాన్యం ఏర్పడింది.