DNEWS:యువతను మత్తుపదార్థాల బారిన పడకుండా కాపాడేందుకు చేపడుతున్న డ్రగ్స్ వ్యతిరేక ఉద్యమానికి సినీ నటుడు అక్కినేని నాగార్జున తన మద్దతు ప్రకటించారు. కేంద్ర మంత్రి జి. కిషన్ రెడ్డి ఆధ్వర్యంలో నవంబర్ 25, 26, 27 తేదీల్లో హైదరాబాద్‌లో నిర్వహించనున్న ‘నషా ముక్త్ భారత్ యాత్ర’ (హైదరాబాద్ వాక్)లో భాగస్వాములు కావాలని నాగార్జునకు ఆహ్వానం అందింది. ఈ మేరకు కేంద్ర మంత్రి కిషన్ రెడ్డి ఆయనను ప్రత్యేకంగా ఆహ్వానించారు. ఈ సందర్భంగా ఇద్దరూ కలిసి యాత్రకు సంబంధించిన టీషర్టులను ఆవిష్కరించారు.

డ్రగ్స్ రహిత సమాజం మనందరి బాధ్యత: నాగార్జున

మత్తుపదార్థాల వినియోగం ముఖ్యంగా యువత జీవితాలపై తీవ్ర ప్రభావం చూపుతోందని నాగార్జున పేర్కొన్నారు. డ్రగ్స్ మహమ్మారిని సమాజం నుంచి పూర్తిగా నిర్మూలించడం ప్రతి ఒక్కరి బాధ్యత అని అన్నారు. ఆరోగ్యకరమైన, మత్తుపదార్థాలకు దూరంగా ఉండే సమాజ నిర్మాణం కోసం చేపట్టే ఇలాంటి కార్యక్రమాలకు తన మద్దతు ఎప్పుడూ ఉంటుందని స్పష్టం చేశారు.

2029 నాటికి డ్రగ్స్ రహిత భారత్ లక్ష్యం

ప్రధాని నరేంద్ర మోదీ ఇచ్చిన ‘నషా ముక్త్ యువా ఫర్ వికసిత్ భారత్’ పిలుపుతో ఈ ఉద్యమాన్ని ముందుకు తీసుకెళ్తున్నట్లు కేంద్ర మంత్రి కిషన్ రెడ్డి తెలిపారు. 2029 నాటికి దేశాన్ని డ్రగ్స్ రహితంగా మార్చాలన్న కేంద్ర హోంమంత్రి అమిత్ షా సంకల్పంలో భాగంగా హైదరాబాద్ వాక్ నిర్వహిస్తున్నట్లు వెల్లడించారు.

భవిష్యత్ తరాల భద్రతను దృష్టిలో పెట్టుకుని చేపడుతున్న ఈ కార్యక్రమంలో యువతతో పాటు తల్లిదండ్రులు, నగర ప్రజలు పెద్ద సంఖ్యలో పాల్గొనాలని కిషన్ రెడ్డి విజ్ఞప్తి చేశారు. డ్రగ్స్‌కు వ్యతిరేకంగా జరిగే ఈ సామాజిక ఉద్యమాన్ని ప్రజలందరూ తమ బాధ్యతగా భావించి విజయవంతం చేయాలని పిలుపునిచ్చారు.

Leave a Reply

Your email address will not be published. Required fields are marked *