
D Spiritual: Nov 17: అయ్యప్ప స్వామి దర్శనం కోసం శబరిమలకు వెళ్లే భక్తులకు మెరుగైన సౌకర్యాలు కల్పించేందుకు కేరళ ప్రభుత్వం ప్రత్యేక ప్రణాళికను సిద్ధం చేస్తోంది. ప్రసిద్ధ పుణ్యక్షేత్రమైన శబరిమలలో ఏటా పెరుగుతున్న భక్తుల రద్దీని దృష్టిలో ఉంచుకుని, తిరుమల తిరుపతి దేవస్థానం తరహాలో ఆధునిక వసతులను అభివృద్ధి చేయాలని నిర్ణయించింది. ఈ విషయాన్ని కేరళ ముఖ్యమంత్రి వీడీ సతీశన్ వెల్లడించారు.
కొచ్చిన్ ఇంటర్నేషనల్ ఎయిర్పోర్ట్ (CIAL) పరిధిలో ఏర్పాటు చేసిన ‘శబరిమల పిల్గ్రిమ్ ఫెసిలిటేషన్ సెంటర్’ను ముఖ్యమంత్రి ప్రారంభించారు. విమానాశ్రయంలోని డొమెస్టిక్ అరైవల్ టెర్మినల్ సమీపంలో సుమారు 5,000 చదరపు అడుగుల విస్తీర్ణంలో ఈ కేంద్రాన్ని నిర్మించారు. కేరళకు విమానాల ద్వారా చేరుకునే అయ్యప్ప భక్తులు ఇక్కడి నుంచే శబరిమల యాత్రకు అవసరమైన సేవలను సులభంగా పొందేలా ఏర్పాట్లు చేశారు.
విమానాశ్రయం నుంచే శబరిమలకు బస్సులు
భక్తుల ప్రయాణ సౌకర్యం కోసం కొచ్చి విమానాశ్రయం నుంచి నేరుగా శబరిమలకు కేఎస్ఆర్టీసీ బస్సు సర్వీసులను అందుబాటులోకి తీసుకొచ్చారు. ఇందుకోసం ప్రత్యేక బుకింగ్ కౌంటర్ను ఏర్పాటు చేశారు. భక్తుల రద్దీ, డిమాండ్ను బట్టి అదనంగా ప్రత్యేక చార్టర్డ్ బస్సులను కూడా నడపనున్నారు. ఈ బస్సు సర్వీసులను ముఖ్యమంత్రి స్వయంగా జెండా ఊపి ప్రారంభించారు.
ఒకే చోట ఆధునిక సదుపాయాలు
శబరిమల యాత్రికుల అవసరాలను దృష్టిలో ఉంచుకుని ఈ కేంద్రంలో అనేక ఆధునిక సౌకర్యాలను అందుబాటులోకి తీసుకొచ్చారు. శబరిమలకు హెలికాప్టర్ సర్వీసుల బుకింగ్ కౌంటర్, ట్రావెవియో దేవస్వం హెల్ప్ డెస్క్, ప్రసాదం కూపన్ బుకింగ్ కౌంటర్, ప్రీపెయిడ్ ట్యాక్సీ బుకింగ్ సదుపాయాలను ఏర్పాటు చేశారు. వీటితో పాటు స్వచ్ఛమైన శాకాహార భోజనశాల, ఏసీ విశ్రాంతి ప్రాంతం, ఉచిత వైఫై, విమానాల రాకపోకల సమాచారం తెలుసుకునేందుకు ఫ్లైట్ ఇన్ఫర్మేషన్ డిస్ప్లే సిస్టమ్ను కూడా అందుబాటులో ఉంచారు.
శబరిమలను పర్యాటక సర్క్యూట్గా అభివృద్ధి చేసే యోచన
శబరిమల యాత్రను కేవలం ఆలయ దర్శనానికే పరిమితం చేయకుండా, కేరళలోని ఇతర ప్రముఖ ఆలయాలను కూడా అనుసంధానిస్తూ ఆధ్యాత్మిక పర్యాటక సర్క్యూట్గా అభివృద్ధి చేయాలని ప్రభుత్వం భావిస్తోంది. దీనివల్ల భక్తులకు ప్రయాణం మరింత సౌకర్యవంతంగా మారడంతో పాటు రాష్ట్రంలో ఆధ్యాత్మిక పర్యాటకానికి ప్రోత్సాహం లభిస్తుందని ప్రభుత్వం ఆశిస్తోంది. తిరుమల తరహాలో శబరిమలలోనూ ఆధునిక వసతులు కల్పించేందుకు ప్రభుత్వం చేపడుతున్న ఈ ప్రణాళికపై అయ్యప్ప భక్తుల్లో ఆసక్తి నెలకొంది.
