Telangana Rythu Bharosa: తెలంగాణలో రైతు భరోసా పథకం నిధుల విడుదలకు సంబంధించి రాష్ట్ర ప్రభుత్వం కీలక నిర్ణయం తీసుకున్నట్లు సమాచారం. యాసంగి సీజన్‌లో పంటలు సాగు చేయని రైతులకు కూడా పెట్టుబడి సాయం అందించే దిశగా ప్రభుత్వం కసరత్తు చేస్తున్నట్లు తెలుస్తోంది. దీంతో రైతుల్లో నెలకొన్న ఆందోళనకు తెరపడే అవకాశం ఉంది.
తెలంగాణలో సీఎం రేవంత్ రెడ్డి నేతృత్వంలోని కాంగ్రెస్ ప్రభుత్వం రైతు భరోసా పథకం అమలుపై దృష్టి సారించింది. రాష్ట్రంలో ఎల్‌నినో ప్రభావంతో వర్షాభావ పరిస్థితులు నెలకొనడం, సాగునీటి కొరత కారణంగా అనేక ప్రాంతాల్లో పంటల సాగు కష్టంగా మారింది. ఇప్పటికే ప్రభుత్వం కొన్ని ప్రాంతాలను కరువు మండలాలుగా ప్రకటించింది. నీటి లభ్యత తక్కువగా ఉన్న నేపథ్యంలో యాసంగిలో వరికి బదులుగా ఆరుతడి పంటలు సాగు చేయాలని రైతులకు సూచించింది.
అయితే, సాగునీరు అందుబాటులో లేకపోవడంతో చాలాచోట్ల రైతులు భూములను ఖాళీగా వదిలేస్తున్నారు. దీంతో ఈసారి యాసంగి సాగు విస్తీర్ణం గణనీయంగా తగ్గే అవకాశం ఉందని వ్యవసాయ శాఖ అధికారులు ప్రభుత్వానికి నివేదిక ఇచ్చినట్లు సమాచారం. ఈ పరిస్థితుల్లో పంటలు సాగు చేయని రైతులకు రైతు భరోసా నిధులు అందుతాయా లేదా అనే సందేహాలు వ్యక్తమవుతున్నాయి.
ఎకరానికి రూ.6 వేల చొప్పున పెట్టుబడి సాయం
తెలంగాణ ప్రభుత్వం రైతు భరోసా పథకం ద్వారా అర్హులైన రైతులకు ఏడాదికి ఎకరానికి రూ.12 వేల పెట్టుబడి సాయం అందిస్తోంది. వానాకాలం, యాసంగి సీజన్లలో ఎకరానికి రూ.6 వేల చొప్పున రెండు విడతల్లో రైతుల బ్యాంకు ఖాతాల్లో నగదు జమ చేస్తోంది. ఇప్పటికే వానాకాలం సీజన్‌కు సంబంధించిన నిధులను ప్రభుత్వం విడుదల చేసింది. ప్రస్తుతం యాసంగి సీజన్ ప్రారంభం కావడంతో రెండో విడత సాయం కోసం రైతులు ఎదురుచూస్తున్నారు.
ఈ క్రమంలో పంటలు సాగు చేసిన భూములకే రైతు భరోసా నిధులు జమ చేస్తారనే ప్రచారం రైతుల్లో ఆందోళనకు కారణమైంది. సాగు చేయని భూములకు పెట్టుబడి సాయం అందకపోతే ఆర్థికంగా ఇబ్బందులు ఎదుర్కోవాల్సి వస్తుందని అన్నదాతలు భావిస్తున్నారు.
సాగు చేయకపోయినా రైతు భరోసా?
తాజా సమాచారం ప్రకారం.. రాష్ట్రంలో నెలకొన్న కరువు పరిస్థితులు, నీటి కొరతను పరిగణనలోకి తీసుకొని అర్హులైన రైతులందరికీ రైతు భరోసా సాయం అందించాలని ప్రభుత్వం యోచిస్తున్నట్లు తెలుస్తోంది. యాసంగిలో పంటలు సాగు చేసినా, చేయకపోయినా అర్హత కలిగిన రైతుల బ్యాంకు ఖాతాల్లో పెట్టుబడి సాయం జమ చేసే అంశాన్ని పరిశీలిస్తున్నట్లు అధికార వర్గాల సమాచారం.
ఈ మేరకు రైతులందరికీ ప్రయోజనం కలిగేలా అవసరమైన ఏర్పాట్లపై ప్రభుత్వం దృష్టి సారించినట్లు తెలుస్తోంది. అయితే, దీనిపై ఇప్పటివరకు అధికారిక ఉత్తర్వులు వెలువడలేదు. ప్రభుత్వం నుంచి స్పష్టమైన ప్రకటన వచ్చిన తర్వాతే నిధుల విడుదలకు సంబంధించిన పూర్తి వివరాలు వెల్లడికానున్నాయి.
గతంలో 70.40 లక్షల మంది రైతులకు రూ.8,759 కోట్లు
గత వానాకాలం సీజన్‌లో రైతు భరోసా పథకం కింద రాష్ట్రవ్యాప్తంగా సుమారు 1.48 కోట్ల ఎకరాలకు సంబంధించి 70.40 లక్షల మంది రైతుల బ్యాంకు ఖాతాల్లో ప్రభుత్వం రూ.8,759 కోట్లను జమ చేసింది. ఈసారి కూడా అర్హులైన రైతులందరికీ పెట్టుబడి సాయం అందించేలా నిర్ణయం తీసుకోనున్నట్లు ప్రచారం జరుగుతోంది.
అయితే, సాగుతో సంబంధం లేకుండా నిధులు విడుదల చేస్తారనే అంశంపై అధికారిక ప్రకటన రావాల్సి ఉంది. ప్రభుత్వం త్వరలోనే దీనిపై స్పష్టత ఇచ్చే అవకాశం ఉందని చర్చ జరుగుతోంది. అప్పటివరకు రైతులు అధికారిక ప్రకటన కోసం ఎదురుచూడాల్సి ఉంటుంది.