D News: Nov 6: నీళ్లు అడిగే నెపంతో ఇంట్లోకి చొరబడి వృద్ధురాలి మెడలో ఆరు తులాల బంగారు పుస్తెలతాడు చోరీ!
ఒంటరిగా ఉండే వృద్ధులను లక్ష్యంగా చేసుకుని దొంగలు కొత్తకొత్త పద్ధతుల్లో నేరాలకు పాల్పడుతున్నారు. అమాయకంగా మాటలు కలిపి నమ్మించడం, సహాయం కోరినట్లు నటించి ఇంట్లోకి ప్రవేశించడం, ఆపై దాడులకు తెగబడటం ఆందోళన కలిగిస్తోంది. తాజాగా సిద్దిపేట పట్టణంలో ఇలాంటి ఘటనే వెలుగులోకి వచ్చింది. నీళ్లు అడిగే నెపంతో ఇంట్లోకి చొరబడిన ఓ దుండగుడు, ఎదురుతిరిగిన వృద్ధురాలిని కత్తితో చంపేస్తానని బెదిరించి ఆమె మెడలోని ఆరు తులాల బంగారు పుస్తెలతాడును దోచుకెళ్లాడు.
పోలీసులు, బాధితురాలి కథనం ప్రకారం.. సిద్దిపేట పట్టణంలోని పాత చేపల మార్కెట్ ప్రాంతానికి చెందిన కళ్లకుంట్ల పెంటమ్మ అనే వృద్ధురాలు బుధవారం సాయంత్రం ఇంట్లో ఒంటరిగా ఉన్నారు. అదే సమయంలో ముఖానికి మాస్క్ ధరించిన ఓ గుర్తుతెలియని వ్యక్తి ఆమె ఇంటి వద్దకు వచ్చాడు. ‘మీ అబ్బాయి ఉన్నాడా? కొంచెం పని ఉంది’ అంటూ మర్యాదగా మాటలు కలిపాడు. ఇంట్లో ఎవరూ లేరని, బయటకు వెళ్లారని పెంటమ్మ సమాధానం ఇచ్చారు. దీంతో ఇంట్లో వృద్ధురాలు ఒంటరిగా ఉన్న విషయాన్ని తెలుసుకున్న నిందితుడు తన పథకాన్ని అమలు చేశాడు.
‘అమ్మా.. చాలా దాహంగా ఉంది. కొంచెం మంచినీళ్లు ఇస్తారా?’ అంటూ ఆమెను అడిగాడు. మానవత్వంతో స్పందించిన పెంటమ్మ ఇంట్లోకి వెళ్లి నీళ్లు తెచ్చి ఇచ్చారు. అయినప్పటికీ నిందితుడు మరోసారి నీళ్లు కావాలని కోరాడు. ఆమె మళ్లీ నీళ్లు తీసుకురావడానికి లోపలికి వెళ్లిన సమయంలో వెనుక నుంచి బలవంతంగా ఇంట్లోకి చొరబడ్డాడు.
ఇంట్లోకి ప్రవేశించిన వెంటనే పెంటమ్మ మెడలో ఉన్న రెండు వరుసల ఆరు తులాల బంగారు పుస్తెలతాడును బలంగా లాగాడు. ఊహించని ఈ ఘటనతో ఒక్కసారిగా షాక్‌కు గురైన వృద్ధురాలు వెంటనే తేరుకుని దొంగను ప్రతిఘటించారు. తన పుస్తెలతాడును కాపాడుకునేందుకు అతడితో పెనుగులాడారు. అయితే, ఆమె గట్టిగా కేకలు వేస్తే చుట్టుపక్కల వారు వస్తారనే భయంతో నిందితుడు బెదిరింపులకు దిగాడు. తన జేబులో కత్తి ఉందని, గట్టిగా అరిస్తే ప్రాణాలు తీస్తానని హెచ్చరించాడు.
అనంతరం వృద్ధురాలిని ఇంట్లోనే బంధించి, బయట నుంచి తలుపునకు గొళ్లెం పెట్టి అక్కడి నుంచి పరారయ్యాడు. కొద్దిసేపటి తర్వాత తేరుకున్న పెంటమ్మ ఇంటి వెనుక తలుపు ద్వారా ఎలాగోలా బయటకు వచ్చారు. వెంటనే ఇరుగుపొరుగు వారికి జరిగిన విషయాన్ని వివరించారు.
బాధితురాలి ఫిర్యాదు మేరకు సిద్దిపేట వన్ టౌన్ పోలీసులు కేసు నమోదు చేసి దర్యాప్తు చేపట్టారు. నిందితుడిని పట్టుకునేందుకు ప్రత్యేక బృందాలను రంగంలోకి దించారు. పాత చేపల మార్కెట్ పరిసర ప్రాంతాల్లోని సీసీటీవీ కెమెరాల ఫుటేజీలను పరిశీలిస్తున్నారు. మాస్క్ ధరించి వచ్చిన వ్యక్తి కదలికలను గుర్తించేందుకు సాంకేతిక ఆధారాలను సేకరిస్తూ నిందితుడి ఆచూకీ కోసం గాలిస్తున్నారు.