AP Telangana Rain Alert: ఆంధ్రప్రదేశ్, తెలంగాణ రాష్ట్రాలకు వాతావరణ శాఖ మరోసారి వర్ష హెచ్చరికలు జారీ చేసింది. నవంబర్ 6 నుంచి 12వ తేదీ వరకు రెండు రాష్ట్రాల్లోని పలు జిల్లాల్లో తేలికపాటి నుంచి భారీ వర్షాలు కురిసే అవకాశం ఉందని వెల్లడించింది. ముఖ్యంగా ఏపీలోని కోస్తాంధ్ర, రాయలసీమతో పాటు తెలంగాణలోని తూర్పు జిల్లాల ప్రజలు అప్రమత్తంగా ఉండాలని సూచించింది.
ఆంధ్రప్రదేశ్‌ను వరుస వర్షాలు వెంటాడుతున్నాయి. ఇప్పటికే తుపానుల ప్రభావంతో రాష్ట్రంలోని పలు జిల్లాల్లో భారీ వర్షాలు కురిసి జనజీవనం అస్తవ్యస్తమైంది. ఇటీవల కురిసిన వర్షాలకు రైతులు తీవ్రంగా నష్టపోయారు. చేతికొచ్చిన పంటలు దెబ్బతినడంతో అన్నదాతలు ఆందోళన చెందుతున్నారు. మరోవైపు పలుచోట్ల ప్రజలు ఆర్థికంగా నష్టపోయారు.
తుపానుల ప్రభావం నుంచి ఇప్పుడిప్పుడే కోలుకుంటున్న ప్రజలకు వాతావరణ శాఖ మరో హెచ్చరిక జారీ చేసింది. రాష్ట్రంలో మళ్లీ వర్షాలు కురిసే అవకాశం ఉందని వెల్లడించింది. నవంబర్ 6 నుంచి 12వ తేదీ వరకు పలు ప్రాంతాల్లో మోస్తరు నుంచి భారీ వర్షాలు నమోదయ్యే సూచనలు ఉన్నాయని తెలిపింది.
ఏపీలో ఈ జిల్లాలకు వర్ష సూచన
భారత వాతావరణ శాఖ అంచనాల ప్రకారం నవంబర్ 6 నుంచి 12 వరకు కోస్తాంధ్ర, యానాంలో అక్కడక్కడా తేలికపాటి నుంచి మోస్తరు వర్షాలు కురిసే అవకాశం ఉంది. కొన్ని ప్రాంతాల్లో భారీ వర్షాలు కూడా నమోదయ్యే సూచనలు ఉన్నాయి.
కోస్తాంధ్రలో ఒకటి రెండు ప్రాంతాల్లో భారీ వర్షాలు కురిసే అవకాశం ఉందని వాతావరణ శాఖ పేర్కొంది. నవంబర్ 10వ తేదీ వరకు గంటకు 30 నుంచి 40 కిలోమీటర్ల వేగంతో, అప్పుడప్పుడు 50 కిలోమీటర్ల వేగంతో బలమైన గాలులు వీచే అవకాశం ఉందని హెచ్చరించింది.
రాయలసీమలోనూ వాతావరణం అనుకూలంగా ఉండదని తెలిపింది. పలు ప్రాంతాల్లో తేలికపాటి నుంచి మోస్తరు వర్షాలు, అక్కడక్కడా భారీ వర్షాలు కురిసే అవకాశం ఉందని అంచనా వేసింది.
తెలంగాణలోని తూర్పు జిల్లాలకు అలర్ట్
తెలంగాణలోనూ రానున్న వారం రోజుల పాటు వర్షాలు కురిసే అవకాశం ఉందని వాతావరణ శాఖ వెల్లడించింది. ముఖ్యంగా నవంబర్ 6, 7 తేదీల్లో రాష్ట్రంలోని పలు జిల్లాల్లో తేలికపాటి వర్షాలు కురిసే సూచనలు ఉన్నాయని తెలిపింది.
ములుగు, భద్రాద్రి కొత్తగూడెం, ఖమ్మం, మహబూబాబాద్, వరంగల్, సూర్యాపేట, నల్గొండ, నాగర్‌కర్నూలు జిల్లాల్లో వర్షాలు కురిసే అవకాశం ఉందని పేర్కొంది. ఉత్తర, పశ్చిమ తెలంగాణ ప్రాంతాల్లోనూ మోస్తరు వర్షాలతో పాటు ఈదురుగాలులు వీచే సూచనలు ఉన్నాయని అంచనా వేసింది.
జలాశయాల పరిస్థితిపై అధికారుల నిఘా
మరోవైపు గోదావరి, కృష్ణా పరీవాహక ప్రాంతాల్లో అక్కడక్కడా వర్షాలు కురిసే అవకాశం ఉన్నప్పటికీ.. పోలవరం సహా ప్రధాన జలాశయాలకు భారీగా వరద నీరు చేరుతుందని ఇప్పుడే అంచనా వేయలేమని అధికారులు స్పష్టం చేశారు.
అయితే ఎగువ ప్రాంతాల్లో వర్షాలు కురుస్తున్న నేపథ్యంలో ఉపనదుల ప్రవాహాలపై నిరంతరం పర్యవేక్షణ కొనసాగించాలని సంబంధిత అధికారులకు సూచించారు. వర్షాలు, బలమైన గాలుల నేపథ్యంలో ప్రజలు అప్రమత్తంగా ఉండాలని, రైతులు పంటల విషయంలో తగిన జాగ్రత్తలు తీసుకోవాలని సూచించారు.